Matematika bo‘yicha xalqaro olimpiada chempioniga uy joy qurib beriladi

Saytimizda «Xalqaro olimpiadalar g‘olibi bo‘lgan buxorolik o‘quvchi oilaviy qiyinchilik tufayli o‘qishini davom ettira olmayapti» sarlavhasi ostida O‘zA xabariga asoslangan holda, Qorako‘l tumanidagi 52-maktabning 9-sinf o‘quvchisi Doniyor Ismoilov, oilaviy qiyinchilik tufayli vaqtini to‘liq ilm olishga sarflay olmayotgani, bo‘sh vaqtlarida va yozgi ta'tilda u non sexlarida ishlab oilasiga yordam qilib kelayotgani haqida yozgan edik.

Doniyor Ismoilov matematika bo‘yicha xalqaro olimpiadalarning ko‘p karra qatnashchisi. Xususan, Bolgariya, Hindistonda o‘tgan matematika bo‘yicha eng nufuzli xalqaro tanlovlarning g‘olibiga aylangan. 3 karra oltin, 2 bora kumush medal sohibi bo‘lgan.

Ushbu xabarga Buxoro viloyat hokimi O‘ktam Barnoyev tezkorlik bilan munosabat bildirib, o‘zining «Feysbuk»dagi sahifasiga post joylashtirdi.

«Buxoro viloyati Qorako‘l tumanidagi Qoraun qishlog‘ida yashovchi, matematika fani bo‘yicha xalqaro olimpiadalar g‘olibi Doniyor Ismoilov haqida ijtimoiy tarmoqlarda e'lon qilinayotgan maqolalar shov-shuvga aylangani bor gap.

Ayniqsa, O‘zA tomonidan e'lon qilingan xabar Buxoro viloyati hokimligi hamda qator mutasaddi tashkilotlari rahbarlarining e'tiborini o‘ziga jalb etmay qo‘ymadi», deyiladi viloyat hokimining postida.

Postda xabar berilishicha, shu kunning o‘zidayoq Buxoro viloyati hokimi O‘ktam Barnoyev Doniyor Ismoilov hamda uning onasi Lobar Rahimova bilan uchrashgan.

Joriy yilning 31 dekabriga qadar oilaga viloyat hokimligi tomonidan uy-joy qurib berilishi, viloyat Xalq ta'limi boshqarmasi tomonidan noutbuk, O‘zbekiston yoshlar ittifoqi viloyat Kengashi tomonidan shaxsiy kutubxona yaratib berilishi belgilangan.

Bosh prokuratura matbuot xizmatining Kun.uz’ga ma'lum qilishicha, Doniyor Ismoilov bilan bog‘liq masala nazoratga olingan. Ayni paytda bu iqtidorli yigit va uning oilasiga daxldor muammolar bilan shaxsan viloyat prokurori shug‘ullanmoqda. «Yosh iqtidorlarimizni hech kimga berib qo‘ymaymiz», degan Bosh prokuratura matbuot xizmati.