Fotoreportaj: Muhojirlar karvoni AQSh chegarasi tomon ketmoqda

Markaziy Amerikaning Honduras davlatidan 7 mingdan ortiq mehnat muhojiri Meksika orqali AQSh chegaralari tomon harakatlanmoqda.

13 oktabr kuni Honduras shimolidagi San-Pedro-Sula shahrida tuzilgan karvonda dastlab 200 kishi bor edi. Keyingi kunlarda unga yana minglab ishsizlar va kambag‘allar, jinoyatchilik darajasi yuqori cho‘qqiga chiqqan mamlakatdan butunlay ketishni istovchi kishilar qo‘shilishdi. 

Bir hafta ichida migrantlar Gvametala hududini kesib o‘tishdi va Meksikada paydo bo‘lishdi. 23 oktabr kuni holatiga ko‘ra, manzilgacha - AQShning Meksika bilan chegaralarigacha 1,8 ming kilometrdan ortiq masofa qolgan.

Karvondagilarning bir qismi piyoda, bir qismi o‘z avtomobillarida harakatlanmoqda. 

AQSh prezidenti Donald Tramp janubiy chegaralarda nazoratni kuchaytirish uchun harbiylarni jo‘natishi bilan tahdid qildi. U shuningdek, bu karvon tufayli Honduras, Salvador va Gvatemalaga moliyaviy yordamni to‘xtatib qo‘yish bilan tahdid qilgan.