Jinoyat ishlari boʻyicha Mirzachoʻl tuman sudi bloger Sirojiddin Odilovni (“Sirojiddin media” MCHJ rahbari) tovlamachilik va firibgarlik jinoyatlarida aybli deb topdi.
Sudning 5-oktabr kungi hukmi bilan, Odilov bir nafar fuqaroga nisbatan Jinoyat kodeksi 165-moddasi 1-qismi (tovlamachilik) va 2 nafar fuqaroga nisbatan 168-moddasi 3-qismi "b,v" bandlari (xizmat mavqeyidan foydalangan holda takroran firibgarlik) bilan bogʻliq jinoyatlarni sodir etganlikda aybli deb topilib, 4 yil muddatga ozodlikdan mahrum qilish jazosi tayinlandi.
Jizzax viloyati sudlari xabarida aytilishicha, sud muhokamasi davomida Sirojiddin Odilov fuqaro D.Shamsiyevning 12 mln soʻm pulini tovlamachilik, G.Jumaniyozovaning 30 mln soʻm, R.Xudoynazarovaning 33 mln soʻm pullarini firibgarlik yoʻli bilan qoʻlga kiritgani toʻliq isbotlangan va Odilov tomonidan jami 75 mln soʻm yetkazilgan zarar qoplangan.
“Alohida taʼkidlash oʻrinliki, mazkur jinoyat ishi yurituvi davomida S.Odilovning ijtimoiy tarmoqlardagi faoliyati yuzasidan biron bir ayblov qoʻyilmagan. S.Odilovning harakatlari yuzasidan ayblov u tomonidan boshqa fuqarolarning mulki firibgarlik va tovlamachilik yoʻli bilan qoʻlga kiritilganligi bilan bogʻliq.
Birinchi instansiya sudining hukmiga faqat yuqori instansiyada protsessual tartibda baho beriladi”, – deyiladi Jizzax viloyati sudlari axborotida.
