Biror bir tahririyat tomonidan yoki jurnalistning shaxsiy tashabbusi bilan joylardagi muammolarni o‘rganish, uning ustida bosh qotirish, murojaatchi (lar)ni tinglash, mutasaddi vakillar bilan muammo yuzasidan suhbatlashish, voqealar rivojini tahlil qilish va yakunda xolis nuqtai nazardan ushbu masalani yoritish juda mashaqqatli ishdir. Aytish lozimki, buning uchun asablar metindan bo‘lishi, tog‘dek sabr kerak bo‘ladi.
2018 yil oktabr
KUN.UZ tahririyati tomonidan ham murojaatlar asosida turli viloyatlarda mavjud muammolar, odamlarni qiynab kelayotgan tashvishlar o‘rganilib, ularning aksari ijobiy yechim topmoqda. Bu quvonarli hol, albatta. Biroq ayrim holatlarda tuman mutasaddilarining muammoli holatlarga bo‘lgan munosabatlari loqaydlarcha ekanligi kishini tashvishga soladi. Ayrim tuman mutasaddilarini topish, ularning izohlarini olish juda amrimahol. Hatto tanqidiy maqola qayta-qayta e'lon qilinsa-da, parvolariga bir kirib chiqmaydi. Buni Sirdaryo viloyati, Guliston tumanida joylashgan “Zarbdor” mahallasidagi muammo bo‘yicha tuman hokimiyati mutasaddilarining munosabati ham yaqqol isbotlab turibdi.
Gap shundaki, joriy yilning 20 fevral kuni saytimizda “Gulistondagi mahalla guldek ochiladimi yoki loyga botib yotaveradimi?”, oradan roppa-rosa olti oy o‘tib (!) “Guliston tumanidagi namunali uylarning namunasiz ko‘chalari. Mutasaddilar bunga nima deydi?” sarlavhasi ostida turkum maqolalar e'lon qilingan edi. Ularda mazkur tumanda joylashgan “Zarbdor” mahallasi ko‘chalari juda ta'mirtalab holga kelganligi, portaldan tortib tuman hokimiyatigacha qilingan murojaatlar javobsiz qolayotganligi, yog‘ingarchilik mavsumida bu ko‘chalarda yurishning mutlaqo iloji yo‘qligi tilga olingan.
