Guliston tumanida bankomatdan pul oʻgʻirlamoqchi boʻlgan shaxs ushlandi. Bu haqda Sirdaryo viloyati IIB matbuot xizmati xabar berdi.
Maʼlum qilinishicha, voqea 12-sentabr kuni soat 3:16 larda Guliston tumanidagi Oltin vodiy mahallasida sodir boʻlgan. Hududdagi bankomatdan qoʻriqlash xizmati monitoring markaziga tashvish signali kelib tushgan.
Tekshiruv davomida yuzini yashirgan holda bolta va boshqa ashyolar bilan bankomatning tashqi qismini buzishga urinayotgan shaxs aniqlangan. Qoʻriqlash xizmati xodimlarini koʻrib, voqea joyidan qochishga uringan gumonlanuvchi tezkor guruh tomonidan qoʻlga olingan.
Surishtiruv jarayonida ushlangan shaxs Guliston tumanida yashovchi, 2008-yilda tugʻilgan D.S. ekani maʼlum boʻlgan. U belgilangan tartibda tuman IIBga olib borilgan.
Hozirda holat yuzasidan tergov-surishtiruv ishlari oʻtkazilmoqda.
