Ichki ishlar vazirining buyrug‘i bilan, polkovnik Sardor Tohirovich Mirzaraimov Sirdaryo viloyati Ichki ishlar boshqarmasi boshlig‘i lavozimiga tayinlandi.
U ilgari Ichki ishlar vazirligi Tezkor-qidiruv departamenti boshlig‘i o‘rinbosari - jinoyat qidiruv xizmati boshlig‘i lavozimida ishlagan.
21-avgust kuni viloyat hokimi Erkinjon Turdimov, Prezident administratsiyasi Jamoat xavfsizligi va qonun ustuvorligi departamenti rahbari Doniyor Qodirov va boshqalar ishtirokida o‘tgan tadbirda Sardor Mirzaraimov viloyat rasmiylariga tanishtirildi.
Sirdaryo viloyati IIBni 2025-yil mart oyidan beri Farrux Haydarov boshqarib kelayotgan edi. Kun.uz kecha u ishdan olingani haqida xabar bergandi. Uning bo‘shatilishi qo‘l ostidagi xodimga og‘ir tan jarohati yetkazgani bilan bog‘liqligi aytilmoqda.
Avvalroq polkovnik Timur Ismoilov ichki ishlar vazirining birinchi o‘rinbosari - Jamoat xavfsizligi departamenti boshlig‘i lavozimiga tayinlangan, shu munosabat bilan Surxondaryo viloyati IIB boshlig‘i lavozimidan ozod etilgan edi.
