Berdimuhamedov Turkmaniston bosh vaziri o‘rinbosarini ishdan haydadi. Unga 11 oy davomida uch marta hayfsan berilgan

14 dekabr kuni Turkmaniston vazirlar mahkamasining majlisi davomida mamlakat prezidenti Gurbanguli Berdimuhamedov sanoat sohasi bo‘yicha bosh vazir o‘rinbosari Karim Durdimurodovni ishdan bo‘shatdi.

TDX davlat axborot agentligi xabariga ko‘ra, davlat rahbari Durdimurodovni nazorati ostida bo‘lgan vazirliklarda korrupsiya, davlat mulkini talon-toroj qilish hamda qo‘shib yozish holatlari avj olganligida ayblagan.

Xususan, uch kun ilgari ishdan bo‘shatilgan to‘qimachilik sanoati vaziri Nepes Gayliyev poraxo‘rlikda gumonlanmoqda.

Bundan tashqari, prezident vazir Garliq tog‘-kon boyitish kombinati moliyaviy masalalarining uddasidan chiqa olmaganidan norozi bo‘ldi.

Eslatib o‘tamiz, Karim Durdimurodov 2018 yilning yanvarida bosh vazir o‘rinbosari lavozimiga tayinlandi. Ishi davomida amaldorga uch marta hayfsan berildi, oxirgisi - 4 dekabrda.

Bosh vazirning transport masalalari bo‘yicha o‘rinbosari Mamatxon Chakiyev sanoat bo‘yicha bosh vazir o‘rinbosari vazifasini vaqtincha bajaruvchi etib tayinlandi.
 
Eslatib o‘tamiz, avvalroq Sooranbay Jeenbekov Qirg‘iziston butun dunyoga sharmanda bo‘lganini aytib, transport vazirini ishdan chetlatishni buyurgandi.