O‘zbekiston shakar ishlab chiqarishni tikladi, import shakarga 20 foizlik soliq joriy etildi

Prezidentning 12 dekabrdagi farmoni bilan import qilinadigan shakarga 20 foizlik QQS joriy etildi.

Shu bilan birga, shakar ishlab chiqaruvchilarni import xom ashyosi asosida ishlab chiqarilgan hajmlar qismiga qo‘shilgan qiymat solig‘idan ozod qilish muddati 2020 yil 1 yanvarga qadar uzaytirildi. Buning oqibatida, O‘zbekiston bozorlarida shakar narxi oshdi, deb yozmoqda Ca-news.

Davlat soliq qo‘mitasi mutaxassisining qayd etishicha, import qilinuvchi shakarni, 2018 yilda amal qilgan, QQSdan ozod etish ichki bozorda talabni qondirish va chakana narxlarning keskin o‘sishiga yo‘l qo‘ymaslik uchun vaqtinchalik chora bo‘lgan.

Ekspertning izoh berishicha, import qilinuvchi shakarga (asosan Ukrainadan) 20 foizlik QQS joriy etilishidan ko‘zlangan maqsad - «mahalliy ishlab chiqaruvchilarga oyoqqa turishga yordam berish».

Hukumat 2017 yil sentyabrida o‘zbek so‘mi devalvatsiyasini e'lon qilganidan so‘ng, O‘zbekistondagi ikki shakar ishlab chiqaruvchi - «Xorazm-Shakar» va «Angren-Shakar» o‘z faoliyatini to‘xtatdi.

Shakarni ulgurji sotish bilan shug‘ullanuvchi tadbirkorning xabar qilishicha, shakar narxi avtomatik tarzda 20 foizga oshdi. «12 dekabrga qadar men shakarni bir kilogramm uchun 4160 so‘mdan sotib olardim, endi u 4500 so‘m turibdi. Bir qop shakar 208 ming edi, hozir esa 225 mingga yetdi. Endi uni bir kilogramm uchun 5300-5500 so‘mdan sotishga majburman», - deya aytib o‘tgan tadbirkor.

Rasmiy ma'lumotlarga ko‘ra, har bir o‘zbekistonlik yiliga o‘rtacha 15-16 kilogramm shakar iste'mol qiladi.

Eslatib o‘tamiz, avvalroq O‘zbekiston Ukrainadan shakar importini tiklagani xabar berilgandi.