O‘zbekistonda yerlarni xususiylashtirish to‘g‘risidagi qonun loyihasi qaytadan e'lon qilindi

Normativ-huquqiy hujjatlar loyihalari muhokamasi portalida “Qishloq xo‘jaligiga mo‘ljallanmagan yer uchastkalarini xususiylashtirish to‘g‘risida”gi qonun loyihasi qaytadan joylashtirildi.

Hujjatga ko‘ra, yer uchastkalarini xususiylashtirishning asosiy prinsiplari quyidagilardan iborat:

qonuniylik;

ixtiyoriylik;

haq to‘lash;

xususiylashtirilayotgan yer uchastkalari va ularda joylashgan ko‘chmas mulk obektlarining umumiyligi;

ochiqlik va shaffoflik.

Yer uchastkalarini xususiylashtirish qonun hujjatlarining talablariga muvofiq qat'iy amalga oshirilishi lozim.

Yer uchastkalarini xususiylashtirish ixtiyoriylik asosida amalga oshirilishi lozim.

Jismoniy va yuridik shaxslar yer uchastkalarini xususiylashtirish huquqlarini o‘z xohish-irodalari bilan va o‘z manfaatlari yo‘lida amalga oshiradilar.

Yer uchastkalarini xususiylashtirishga majburlash taqiqlanadi.

Yer uchastkalarini xususiylashtirish to‘lov asosida amalga oshirilishi lozim.

Jismoniy va yuridik shaxslarning ko‘chmas mulk obektlari joylashgan yer uchastkalarini xususiylashtirish huquqi faqat ushbu obektlarning egalariga tegishlidir.

Davlat mulki bo‘lgan ko‘chmas mulk obektlari joylashgan yer uchastkalarini xususiylashtirish ushbu yer uchastkalarida joylashgan ko‘chmas mulk obektlarini xususiylashtirish bilan bir vaqtda amalga oshiriladi.

Ochiqlik va shaffoflik prinsipi Yer uchastkalarini xususiylashtirish jarayoni ochiq va shaffof bo‘lishi lozim.

Davlat organlari va tashkilotlar, davlat hokimiyati va boshqaruvi organlari faoliyatining ochiqligi to‘g‘risidagi qonun hujjatlarida belgilangan tartibda, yer uchastkalarini xususiylashtirish to‘g‘risidagi axborotdan erkin foydalanishni ta'minlashi shart.

Ushbu Qonunning maqsadlari uchun xususiylashtirish obektlari quyidagilardan iborat:

yer uchastkalarida joylashgan yuridik shaxslar tomonidan xususiylashtirilayotgan yoki ularga mulk huquqi asosida tegishli bo‘lgan bino va inshootlar, sanoat infratuzilmasi obektlari, shuningdek ularga tutash hududlardagi ishlab chiqarish faoliyatini amalga oshirish uchun zarur miqdordagi yer uchastkalari;

O‘zbekiston Respublikasi fuqarolariga yakka tartibdagi uy-joy qurilishi va turar-joyiga xizmat ko‘rsatish uchun beriladigan yer uchastkalari;

bo‘sh turgan yer uchastkalari;

O‘zbekiston Respublikasi Iqtisodiyot va sanoat vazirligi qoshidagi Urbanizatsiyani rivojlantirish jamg‘armasiga o‘rnatilgan tartibda taqdim etilgan yer uchastkalari.

Quyidagi yer uchastkalari xususiylashtirilmaydi:

tasdiqlangan va e'lon qilingan rejalashtirish sxemalari bo‘lmagan hududlarda joylashgan;

ro‘yxati qonunchilikka muvofiq belgilangan foydali qazilmalar konlari, davlat mulkiga tegishli bo‘lgan xususiylashtirilmaydigan strategik obektlar;

tabiatni muhofaza qilish, sog‘liqni saqlash, rekreatsion va tarixiy-madaniy maqsadlarda, shuningdek o‘rmon va suv fondlari tarkibiga kiruvchi yerlar;

erkin iqtisodiy va kichik sanoat zonalari ishtirokchilariga berilgan yer uchastkalari.

Yer uchastkalarini xususiylashtirish sub'yektlari – O‘zbekiston Respublikasi fuqarolari va yuridik shaxslar – O‘zbekiston Respublikasi rezidentlari bo‘lishi mumkin.

Xorijiy davlatlar fuqarolari va yuridik shaxslar – O‘zbekiston Respublikasi norezidentlari, shuningdek fuqaroligi bo‘lmagan shaxslar yer uchastkalarini xususiylashtirish sub'yekti bo‘la olmaydi va ushbu Qonun va O‘zbekiston Respublikasining Yer kodeksida ko‘zda tutilgan hollarda yer uchastkalariga ega bo‘lishlari mumkin.

Yer uchastkalarini xususiylashtirish quyidagi shakllarda amalga oshiriladi:

doimiy foydalanish (tasarruf etish)da yoki umrbod meros qilib qoldiriladigan yer uchastkalarini yuridik va jismoniy shaxslar tomonidan sotib olinishi;

elektron onlayn-auksion orqali yer uchastkalarini sotish.

Yer uchastkalarini xususiylashtirishdan tushadigan mablag‘lar Urbanizatsiyani rivojlantirish jamg‘armasiga yo‘naltiriladi.

Hujjatning to‘liq matni bilan quyidagi havola orqali tanishish mumkin.

Eslatib o‘tamiz, joriy yilning fevral oyi oxirlarida ham O‘zbekistonda yerlarni xususiylashtirish to‘g‘risidagi qonun loyihasi e'lon qilingandi.