Bu davlat mulkini boshqarish va sotishning yangi mexanizmlarini belgilab beruvchi prezident farmonida nazarda tutilgan.
Hujjatga koʻra, hududlarda, shu jumladan olis joylarda joylashgan va xaridorlar uchun jozibador boʻlmagan qishloq xoʻjaligiga moʻljallanmagan yer uchastkalari uchun yangi mexanizm qoʻllanadi.
Xususan, boshlangʻich narxni bosqichma-bosqich pasaytirish mexanizmi qoʻllanganidan keyin ham uch oydan ortiq vaqt davomida sotilmagan yer uchastkalariga boʻlgan mulk va ijara huquqini yuridik shaxslarning ustav kapitaliga ulush sifatida kiritishga ruxsat beriladi.
Bu ochiq elektron auksion savdolari orqali va tegishli loyihani amalga oshirish sharti bilan amalga oshiriladi.
Bunda auksionda hatto bitta talabgor qatnashgan taqdirda ham yer uchastkasiga boʻlgan huquq uning ustav kapitaliga eʼlon qilingan narxda kiritilishi mumkin. Natijada shakllangan ulush keyinchalik mazkur yuridik shaxsning oʻziga sotib olish uchun taklif qilinadi.
Farmon bilan davlat koʻchmas mulkini xususiylashtirish jarayoni ham soddalashtirilmoqda. Davlat koʻchmas mulk obyektlari xususiylashtirilganda, ularga biriktirilgan yer uchastkalariga nisbatan sotuvgacha mavjud boʻlgan huquqlar yangi mulkdor uchun saqlab qolinadi.
Bu umrbod egalik qilish, doimiy foydalanish va ijara huquqlariga taalluqli. Eng muhimi, bunday holatlarda yer uchastkalari boʻyicha ijara shartnomalarini qaytadan tuzish talab etilmaydi.
Shuningdek, yer uchastkalarini «tayyor paket» usulida auksionga chiqarish tizimi yoʻlga qoʻyiladi. Bunda yer uchastkasi hududiy arxitektura-shaharsozlik kengashi bilan oldindan kelishiladi va qurilish uchun zarur boʻlgan barcha ruxsatnoma hujjatlari rasmiylashtiriladi. Shundan keyingina u tayyor investitsiya taklifi sifatida savdoga qoʻyiladi.
Ushbu jarayonni tashkil etish uchun mahalliy ijro etuvchi hokimiyat organlari hamda ular muassisligidagi investitsiya kompaniyalari masʼul boʻladi.
«Tayyor paket»ni ishlab chiqish bilan bogʻliq xizmatlar xarajatlarini mahalliy byudjet mablagʻlari hisobidan qoplashga ruxsat beriladi. Keyin yer uchastkasi auksionga chiqarilganda mazkur xarajatlar uning boshlangʻich narxiga qoʻshiladi.
Yer sotilganidan keyin «tayyor paket»ni ishlab chiqish uchun sarflangan mablagʻlar savdodan tushgan mablagʻlar hisobidan qoplanadi.
