Bu iqtisodiyotda davlat ishtirokini qisqartirish va xususiylashtirish jarayonlarini jadallashtirishga qaratilgan prezident farmonida belgilandi.
Hujjatga koʻra, davlat va davlat ishtirokidagi korxonalar aktivlari, shuningdek, qishloq xoʻjaligiga moʻljallanmagan yer uchastkalarini elektron onlayn auksion orqali sotish tartibiga qator oʻzgartishlar kiritiladi.
Xususan, elektron onlayn auksionlarda har bir auksion qadami sotuvga qoʻyilgan obyekt boshlangʻich narxining 1 foizi miqdorida belgilanadi.
Takroriy savdolarda esa faqat bitta talabgordan ariza kelib tushsa ham, savdo natijasiz deb topilib qolmaydi. Yagona talabgorga lotni ushbu savdoda eʼlon qilingan narxda ixtiyoriy ravishda sotib olish taklif etiladi.
Shuningdek, elektron onlayn auksion va tanlov savdolari haqidagi xabarnomalarni oldindan eʼlon qilish muddati ikki baravar qisqartiriladi.
Amaldagi 30 kunlik muddat 15 kunga, takroriy savdolardagi 10 kunlik muddat esa 5 kunga tushiriladi. Bu davlat aktivlarini savdoga chiqarish va realizatsiya qilish jarayonini tezlashtirish imkonini beradi.
Sotilmagan aktivlar «gibrid auksion»ga chiqariladi
Farmon bilan uch oy davomida sotilmagan davlat aktivlarini realizatsiya qilishning yangi mexanizmi ham joriy etiladi.
Bunday aktivlarni elektron onlayn auksion va tanlov savdolarida anglo-golland modelidagi «gibrid auksion» asosida sotishga ruxsat beriladi.
Bunda takroriy auksion obyektning boshlangʻich bahosidan boshlanadi. Dastlab savdo davomida narx har bir qadamda 2 foizdan pasaytirib boriladi.
Xaridorlardan biri aktivni sotib olish istagini bildirganidan keyin jarayon teskari yoʻnalishda davom etadi: talabgor taklif bildirgan narx yangi boshlangʻich nuqta sifatida olinib, keyingi takliflar narxni oshirib borish tartibida qabul qilinadi.
Shu tariqa, dastlab xaridor paydo boʻlgunga qadar narx bosqichma-bosqich pasaytiriladi, talab paydo boʻlgach esa aktiv eng yuqori narxni taklif qilgan ishtirokchiga sotilishi mumkin boʻladi.
Xususiylashtirilayotgan korxona foydasi boʻyicha ham yangi qoida
Farmonda davlat ishtirokidagi korxonalarni xususiylashtirishga oid yana bir tartib belgilangan.
