O‘zbekistonda yangi telekanal tashkil etish taklif etildi

“Mening fikrim” jamoaviy murojaatlar portalida xorijiy tillarni o‘rgatuvchi maxsus telekanalni tashkil etish haqida petitsiya paydo bo‘ldi.

Bildirilishicha, hozirgi kunga kelib davlatimizda xorijiy tillarni o‘qitish davlat siyosati darajasiga ko‘tarildi. 

“Mening taklifim, xorijiy tillarni o‘rgatishga ixtisoslashtirilgan maxsus telekanalni ishga tushirish kerak. Chunki, xorijiy tillar, birinchi navbatda ingliz tilini o‘rganishga bo‘lgan qiziqish juda yuqori. Kanal ochiladigan taqdirda, mashhur xorijlik professor-o‘qituvchilarning ma'ruzalari, ingliz tili va boshqa fanlardan videodarslar, kinofilmlar (subtitles), musiqalar (lyric), har xil turdagi ko‘ngilochar ko‘rsatuvlar, o‘zbek va jahon adabiyoti klassikalarining inglizcha talqini, xalqaro ta'lim dasturlari, innovatsiyalar va ilm-fan yutuqlari haqida ma'lumotlar telekanal dasturlaridan o‘rin oladi”, - deb yozadi murojaat muallifi. 

Qayd etilishicha, mazkur telekanalni onlayn kanal shaklida ochish ham mumkin, keyinchalik raqamli televideniye tarzida efirga uzatish maqsadga muvofiq. Telekanal ko‘rsatuvlarini sifatli, mazmunli tayyorlanishi va moliyaviy masalalarni hal etilishida poytaxtdagi xalqaro oliy ta'lim muassasalari, xorijiy tillarni o‘rgatuvchi vakolatxonalarning ofislari, xususiy o‘quv markazlari bilan o‘zaro kelishuv va davlat-xususiy sherikchilik asosida hamkorlik qilish mumkin.

“Mazkur taklif ko‘rib chiqilib, O‘zbekiston milliy teleradiokompaniyasi tomonidan amalga oshirilsa, xorijiy tillarni o‘rgatish sohasida o‘ziga xos qadam bo‘lar edi”, - deyiladi petitsiyada. 

Bundan oldin, O‘zbekistonda bolalar uchun yana bir telekanal paydo bo‘lishi mumkin ekani xabar qilingandi.