Murojaatlarni ko‘rib chiqish muddatlari buzgan 19 nafar xodim ishdan olindi

Prezident Xalq qabulxonasi tomonidan vazirlik, idora va hokimliklarning murojaatlar bilan ishlash faoliyati bo‘yicha o‘rganish o‘tkazilmoqda.

O‘rganishlar natijasida 41 ta vazirlik, idora va hokimliklar tomonidan jami 1070 ta holatda murojaatlarni ko‘rib chiqish muddatlari buzilgani aniqlandi.

Mazkur holatlar yuzasidan Prezident Xalq qabulxonasi tomonidan tegishli tashkilotlar rahbarlariga vaziyatni zudlik bilan bartaraf etish, mas’ul xodimlarni javobgarlikka tortish hamda kelgusida bunday holatlarga yo‘l qo‘ymaslik bo‘yicha tegishli choralar ko‘rish talabi bilan nazorat xatlari yuborildi.

Tahlillarga ko‘ra, hisobot davrida  murojaatlarning ijro muddatlarini eng ko‘p buzgan TOP-10 hokimliklar, vazirlik va idoralar ro‘yxati:

Andijon viloyati hokimligi – 137

Kambag‘allikni qisqartirish va bandlik vazirligi – 107

Surxondaryo viloyati hokimligi – 103

Raqobatni rivojlantirish va iste’molchilar huquqlarini himoya qilish qo‘mitasi – 79

O‘zbekiston mahallalari uyushmasi – 65

Toshkent shahar hokimligi – 55

Qashqadaryo viloyati hokimligi – 45

Oila va xotin-qizlar qo‘mitasi – 45

Namangan viloyati hokimligi – 44

Aniqlangan holatlar bo‘yicha tashkilot va idoralarda ichki xizmat tekshiruvlari o‘tkazilib, 36 nafar xodim intizomiy javobgarlikka tortildi, 19 nafar xodim lavozimidan ozod etildi.

Shuningdek, 600 ga yaqin murojaatlarni ko‘rib chiqish muddatlari buzilishiga yo‘l qo‘ygan hamda aniqlangan kamchiliklar bo‘yicha tegishli choralar ko‘rmagan 13 ta vazirlik va idoralarga oid materiallar huquqiy baho berish uchun Bosh prokuraturaga taqdim etildi.