Zelenskiyning uyi yaqinida pulemyot o‘rnatilgan mashinada noma'lum shaxslar ushlandi

Ukraina prezidenti lavozimiga nomzod Vladimir Zelenskiyning uyi yaqinida politsiya  xodimlari tomonidan “Toyota-Prado” avtomobilida pistirmada o‘tirgan uch noma'lum shaxs ushlandi. Bu haqda oliy rada deputati Anton Gerashchenko feysbukda ma'lum qilgan.

Ushlanganlar yo‘ltanlamasning orqa qismini o‘t ochish uchun moslashtirishgan – ular o‘rindiqlarni olib tashlab, yonlaridan topilgan yirik kalibrli pulemyot uchun tayanch vazifasini o‘tagan moslamani o‘rnatishgan. 

Ta'kidlanishicha, gumonlanuvchilar o‘z “o‘ljasini” “Perlina Іtalіyi” kottej posyolkasiga olib boruvchi yo‘l yonidagi o‘rmonda kutib o‘tirishgan. Zelenskiyning uyi aynan shu posyolkada joylashgan. 

“Qurollangan guruh” ushlangani haqida Ukraina bosh prokurori Yuriy Lutsenko ham xabar qilgan. Biroq uning versiyasiga ko‘ra, ushlanganlar lvovlik jinoiy avtoritetga suiqasd qilmoqchi bo‘lishgan.