DW xabariga koʻra, Ukraina prezidentining kommunikatsiyalar boʻyicha maslahatchisi Dmitriy Litvin 25-sentabr kuni «Ukrainskaya pravda» nashriga bergan izohida Bloomberg maʼlumotini «haqiqatga toʻgʻri kelmaydigan axborot» deb atagan.
Bloomberg manbalariga koʻra, Tramp bu taklifni Nyu-Yorkda BMT Bosh Assambleyasi sessiyasi doirasida Zelenskiy bilan uchrashuv vaqtida bildirgan. Agentlik Ukraina prezidenti taklifni rad etganini yozgan. Zelenskiyga yaqin manbalar esa bu taklif uni ranjitganini aytgan.
Shu hafta Zelenskiy va Rossiya tashqi ishlar vaziri Sergey Lavrov Nyu-Yorkda Tramp maʼmuriyati vakillari bilan alohida uchrashuvlar oʻtkazgan.
Bloomberg maʼlumotiga koʻra, jahonda dizel yonilgʻisi narxlari oshayotgan bir paytda Vashington Moskva va Kiyevni energetika obyektlariga hujumlarni toʻxtatish boʻyicha kelishuvga erishishga undagan.
Muzokaralar BAAda oʻtkazilishi mumkin
Zelenskiy 25-sentabr kuni AQSH, Ukraina va Rossiya oʻrtasidagi texnik formatdagi uch tomonlama muzokaralar Birlashgan Arab Amirliklarida oʻtkazilishi mumkinligini bildirgan.
Ayni paytda, Kreml Kiyevning urushni tugatish boʻyicha muzokaralarni Mayamidagi G20 sammiti vaqtida oʻtkazish haqidagi yaqinda bildirgan taklifini rad etgan. Vashington ushbu sammitga Rossiya prezidenti Vladimir Putinni ham taklif qilgan.
Rossiya tomoni Putin va Zelenskiy uchrashuvi faqat Moskvada oʻtishi mumkinligini bir necha bor taʼkidlagan. 23-sentabr kuni Rossiya prezidenti matbuot kotibi Dmitriy Peskov Zelenskiy «istasa, Moskvaga kelishi mumkinligi» va unga «zarur xavfsizlik kafolatlari berilishi»ni aytgan.
Iyun oyida Putin Zelenskiy rossiyalik tadbirkorlardan biri orqali undan shaxsiy uchrashuv soʻraganini bildirgan edi. Keyinchalik Ukraina prezidenti Kreml rahbariga Roman Abramovich orqali maktub yoʻllaganini maʼlum qilgan.
