Yo‘liga tushib olgan «Lokomotiv», Qosimov jamosiga 4 ta gol urgan «Nasaf», 5 turdan buyon gol urayotgan Temurxo‘ja – Superliga 6-tur yakunlari

Amaldagi chempion «Lokomotiv» 1-turda «Paxtakor»ga yengilganidan so‘ng faqat g‘alaba qozonmoqda. Ketma-ket 5-o‘yinda g‘alaba qozongan «Loko» yetakchi «Paxtakor»ni izma-iz tanqid qilmoqda. Bu turda «temiryo‘lchilar» Navoiyning «Qizilqum» jamoasini qabul qilib xotirjam tarzda g‘olib bo‘lishdi.

Temurxo‘ja Abduxoliqov, Islom To‘xtaxo‘jayev hamda Jamshid Iskanderovlar chiroyli gol urib, «Lokomotiv»ning g‘alabasini ta'minlashdi. «Qizilqum» murabbiyi Hamidjon Aktamov o‘yindan keyin keskin gaplar aytdi. Uning fikricha, hamma «Qizilqum»ning mag‘lubiyatidan so‘ng Aktamov murabbiy emas, menejyer degan gapni eslab qoladi. Shuningdek murabbiy «Qizilqum»da doim maydonga tushadigan 10 ta futbolchi borligini aytib, zaxira o‘rindig‘ining keng emasligidan nolidi.

Temurxo‘ja 5 ta o‘yindan buyon gol urmoqda

«Lokomotiv»ning 6-turdagi o‘yinida ham gol urgan Temurxo‘ja Abduxoliqov ajoyib seriya qayd etmoqda. U Superliganing ketma-ket 5-o‘yinida gol urdi. Temurxo‘janing gollaridan «Navbahor», «Andijon», OKMK, «Buxoro» va «Qizilqum» navbati bilan «jabr ko‘rdi». Mavsum avvalini samarali o‘tkazayotgan Abduxoliqov hozirgacha «Loko» safida 11 o‘yinda qatnashib, 8 ta gol urishga muvaffaq bo‘ldi.

Qosimov jamoasi Qarshida 4 ta gol o‘tkazib, oxirgi pog‘onaga «sho‘ng‘idi»

Mirjalol Qosimov qo‘l ostidagi OKMK o‘z maydonida «Qo‘qon-1912»ga 7 ta gol urganidan so‘ng klubda hammasi joyiga tushgandek ko‘ringandi, ammo bunaqaga o‘xshamaydi. 6-turda Olmaliq klubi Qarshida «Nasaf» mehmoni bo‘ldi va 0:4 hisobida mag‘lub bo‘ldi. Andijondagi mag‘lubiyatdan alamzada bo‘lgan qarshiliklar Qosimov jamoasini ayab o‘tirishmadi.

O‘yindan so‘ng Ro‘ziqul Berdiyev jamoasi Mirjalol Qosimovni «saqlab qolish» haqida o‘ylamaganini ham aytdi. Bu g‘alabadan so‘ng «Nasaf» oxirgi pog‘onani tark etdi va birdaniga 8-o‘ringa ko‘tarildi. OKMK esa oxirgi o‘ringa joylashdi.

«Qo‘qon-1912» darvozasiga noto‘g‘ri penalti belgilagan hakam diskvalifikatsiya qilindi

6-turning «Metallurg» hamda «Qo‘qon-1912» jamoalari o‘rtasidagi o‘yinida bekobodliklar 3:1 hisobida g‘alaba qozonishdi. «Metallurg»ning gollaridan birini Stanislav Andreyev penaltidan urdi. O‘FA qoshidagi hakamlar faoliyati bilan shug‘ullanuvchi departament Bekoboddagi o‘yinda ishlagan hakam Ahrol Risqullayevning penalti belgilangan vaziyatdagi qarorini xato deb topdi. Oqibatda Risqullayev Superliga o‘yinlarini boshqarishdan «noma'lum muddatga» chetlashtirildi.

«Bunyodkor» Buxoroda mag‘lubiyatdan qutulib qoldi

Vadim Abramov murabbiyligidagi «Bunyodkor» bu turda «Buxoro» mehmoni bo‘ldi. «Qaldirg‘ochlar» yosh futbolchilardan iborat jamoa bo‘lishiga qaramay, Buxoroga favorit sifatida yo‘l oldi. Baxtiyor Ashurmatov bilan o‘yinini topa olmayotgan «Buxoro» birinchi bo‘limni murabbiyning ta'biri bilan aytganda «uyaladigan tarzda yomon» o‘tkazdi. Birok ikkinchi bo‘limda hisobni tenglashtirib, oldinga ham chiqib olgan buxoroliklar g‘alabani qo‘ldan boy berdi. O‘yinni yuqori saviyada o‘tkazgan Xurshid G‘iyosov dubl qayd etib, jamoasini mag‘lubiyatdan qutqarib qoldi.

Hafta qahramoni: Xurshid G‘iyosov

Ko‘plab yetakchilar tark etgan «Bunyodkor»ning bugungi asosiy yulduzi Xurshid G‘iyosov. Milliy jamoada ham o‘ynashga ulgurgan G‘iyosovga ham boshqa klublardan takliflar bo‘lgandi, lekin u «Bunyodkor»da qolishga qaror qildi. Va adashmadi... Hozir «Bunyodkor»ning asosiy «qaldirg‘ochi» bo‘lgan Xurshid Buxoroda jamoasining haqiqiy yetakchisi ekanini ko‘rsatib, ikkita gol urdi. Uning birinchi goli ayniqsa chiroyli chiqdi. Xurshidni haftaning eng yaxshi futbolchisi deb topdik.