«Kiyevdan keting!»: Rossiya katta hujumdan ogohlantirdi – hafta dayjesti

Hafta davomida insoniyat yana 11-sentabr dahshatini his qildi, dunyoni ostin-ustun qilib yuborishi mumkin boʻlgan hodisaning oldi olindi. Islom olamining muqaddas shahri Madinada dron portladi. Urush nafasi endi eng mahram yerlargacha yetib bordi. Insoniyat koinotni zabt etayotgan bir vaqtda dunyoning eng katta davlatlari xuddi oʻtgan asrga qaytgandek «solyarka» boʻyicha kelishuvga erishdi.

Bu stansiya musulmon olamining ikki muqaddas manzilidan biri Masjidul Nabaviyaga elektr uzatadigan inshootlardan biri ekani musulmonlarda qattiq xavotir uygʻotdi. Intimoiy tarmoqlardan fikrlardan bilish mumkinki, dunyodagi aksar musulmonlar bu husiychilar hujumi ekaniga ishonmayapti. Avvalroq Saudiya tomoni «husiychilarning Makka tomon uchayotgan droni urib tushirilganini» aytgan, guruh bu ayblovni ham rad etgandi. Balki bu chindan ikki muqaddas shaharga hujum qilinayotganiga urgʻu berish orqali amalga oshirilayotgan axborot urushidir.

Ronalduni ranjitishdi

Portugaliya futboli afsonasi Krishtianu Ronaldu Millatlar Ligasi doirasidagi Norvegiyaga qarshi oʻyinda zaxirada qoldirilgach, milliy jamoa lagerini tark etdi. «Vaqti kelsa, nima boʻlganini batafsil aytib berishini» vaʼda qildi. Bu bayonot futbol olamida katta shovqin koʻtardi. Portugaliya milliy jamoasining sahifalarini millionlab Ronaldu muxlislari tark etishni boshladi va bu hali boshlanishi.

Krishtianuni qaytarish uchun «butun Portugaliya oyoqqa turgani», bosh vazir unga qoʻngʻiroq qilib gaplashishga uringani haqida gaplar chiqdi, lekin keyingi oʻyinda bu gaplarning barchasini soyada qoldiruvchi ish boʻldi. Ronaldu mashhur qilgan 7-raqamni jamoaning boshqa futbolchisi Rafayel Leauga berib yuborishdi. Bu futbol afsonasiga nisbatan hurmatsizlik boʻldi.

Rossiya katta hujum tayyorlamoqda

Rossiya xorijiy davlat fuqarolarini, xususan, diplomatlarni Kiyevni tark etishga chaqirdi. Bu amalda Ukraina poytaxi boʻylab navbatdagi katta hujumning anonsi boʻldi. Ukraina saylov kuni Rossiyaga urush davridagi eng yirik hujumlardan birini amalga oshirgandi. Aftidan, oʻshandan keyin yaxshilab zaxiralarini toʻldirib olgan ruslar javob zarbalari bermoqchi.

Urush boshida bunday bayonotlar xavotir bilan qarshi olinar, Kreml undan dushmanni qoʻrqitish uchun foydalanardi. Lekin endi «Kiyevdan keting, biz raketa otamiz», deyishlari kundalik xabarlarda birrovga eslab ketiladigan voqeaga aylanib qoldi. Chunki Rossiya besh yil avval «ozod qilish uchun borgan» yon qoʻshnisiga tonnalab bomba otishi endi yangilik emas.

Dunyoda dizel inqirozi

Bizda traktor, kran yoki shunga oʻxshash ogʻir texnika haydovchilar «solyarka» qimmat boʻlyapti, shunga narx oshdi», desa, koʻpchilik bahona qilyapti deb oʻylardi. Lekin ishoning, bu aslo bahona emas. Hozir butun dunyoda dizel taqchilligi yuzaga keldi. Yevropa-yu Amerikada ham shu ahvol. Toʻgʻri, ularda yoqilgʻiga har baloni qoʻshib sotishmas, lekin narx koʻtarilayotgani bor gap. Tramp bekorga Zelenskiyni dizel taqchilligida ayblab yurgani yoʻq.

Hafta davomida G7 davlatlari favqulodda zaxiralardan bozorga neft va neft mahsulotlari chiqarishga kelishib oldi. Xususan, dastlabki 20 kunda bozorga koʻproq dizel chiqariladi. Bu orqali narx tushishiga umid qilishmoqda. Muammo qayerdan kelib chiqqani tushunarli. Dunyoga arab davlatlari katta miqdorda neft yetkazib beradi, Hoʻrmuz xavfli hudud boʻlib qolgani sabab bozorga mahsulot chiqishi qiyinlashdi.

Bundan tashqari, Ukraina yana bir yirik ishlab chiqaruvchi Rossiyaning neft zavodlarini urib yotibdi. Oqibatda bozorga kam mahsulot chiqyapti. Jahon bozorda haqiqiy bozor qoidalari ishlaydi – mahsulot kammi, narx oshadi.

Ilon Mask koʻp marta foydalanish mumkin boʻlgan raketalarini qayta-qayta uchirib, Oyga tobora yaqinlashayotgan bir vaqtda «ultrazamonaviy» dunyoda «solyarka» muammosi, xuddi «Temir xotin» filmidagi kabi. Bir qarashda dunyo haddan tashqari zamonaviylashib ketdi, uchadigan taksilar chiqdi, Oy bir qadam, Mars qoʻl yetgulik joyday koʻrinmoqda, lekin inson hamon traktorlarni dalaga chiqarish uchun dizel muammosi bilan oʻralashib yuribdi.

Urush ana shunaqa yomon narsa. Butun boshli rivojlanishlarni ortqaga tortadi, insoniyat bir yerda depsinib turganday boʻlaveradi. Shu uchun hech qachon urush boshlamaslik kerak, ayniqsa hozirgi texnika, rivojlanish asrida. Davlatlar yaxshi yashash, fuqaroga yaxshiroq sharoit qilib berish uchun bahslashishi kerak, kim koʻproq odam oʻldirishi ustida emas. Omon boʻling.