Ma'lumki, joriy yil mart oyida O‘zbekiston Prezidentining “O‘zbekiston Respublikasida elektr energetika tarmog‘ini yanada rivojlantirish va isloh qilish strategiyasi to‘g‘risida”gi PK-4249 sonli qaroriga muvofiq, “O‘zbekenergo" AJ tizimida uchta alohida aksiyadorlik jamiyatlari tuzilishi belgilangan. “Oʻzbekenergo” AJ o‘rnida yangi tashkil etilgan "Issiqlik elektr stansiyalari" AJ, “Milliy elektr tarmoqlari” AJ va “Hududiy elektr tarmoqlari” AJ nomiga o‘zgartirildi.
Bundan ko‘zlangan maqsad elektr energiyani ishlab chiqarish, yetkazish, taqsimlash va sotishni tashkil etishning zamonaviy uslublariga o‘tishdan iboratdir.
“Andijon hududiy elektr tarmoqlari” jamiyati mazkur islohotlar, bunyodkorlik ishlarini izchil olib borish, xodimlarga qulay ish sharoitlarini yaratib berish maqsadida bir qator ishlarni amalga oshirmoqda.
Jumladan, “Andijon XETK” AJning markaziy binosi hamda uning tasarrufidagi shahar va tuman elektr ta'minoti korxonalari - Marhamat, Jalaquduq, Buloqboshi, Izboskan, Asaka tuman, Baliqchi binolarini qayta ta'mirlash, zamonaviy-shaharsozlik me'yorlari asosida rekonstruksiya qilish ishlari olib borilmoqda.
Jamiyatda aholini uzluksiz, sifatli elektr energiyasi bilan ta'minlash uchun zamonaviy, innovatsion loyihalarni ishga tushirishga alohida e'tibor qaratiladi.Andijon tumanida joylashgan 110/35/10 kV kuchlanishli “Kamolot” nimstansiyasi 16 000 kVA quvvatga ega. Ushbu podstansiyaga zamonaviy elektr qurilmalar o‘rnatilgan.
Podstansiyani qurib ishga tushirilishi natijasida Andijon shahrining «Pistamozor», Sho‘rbuloq MFY, Andijon tumanining Xrabek, Xortum hamda Jalaquduq tumanining Janubiy Olamushuk qishloqlaridagi aholi xonadonlari, ijtimoiy soha obektlariga sifatli elektr energiyasi yetkazib berilmoqda.
Andijon tumani Xrabek massivida “Andijon-Farm erkin iqtisodiy zona” tashkil etilishi munosabati bilan tashqi elektr ta'minoti uchun Kamolot podstansiyasiga qo‘shimcha T-2 sifatida 10 000 kVA quvvatli kuch transformator olib kelib o‘rnatildi.
Joriy yilning fevral oyida viloyatning Xo‘jaobod tumanidagi aholi va yuridik iste'molchilarga yanada sifatli elektr energiya yetkazib berish maqsadida 110/35/10 kV kuchlanishli Zavroq podstansiyasidagi yuklama bilan ishlayotgan 10 000 kV kuch transformatori quvvatini oshirish uchun yangi zamonaviy 25 000 kV kuch transformatori olib kelindi va shu oy ichida ishga tushirildi.
