Bugun, 19 iyun kuni Adliya vazirligi tomonidan tashkil etilgan brifingda Davlat test markazi hamda Oliy va o‘rta maxsus ta'lim vazirligi mutasaddilari ishtirok etdilar.
Tadbirni kuzatib borgan bloger Shahnoza To‘raxo‘jayeva unda e'lon qilingan ma'lumotlar bilan o‘rtoqlashdi.
Adliya vazirligi tomonidan tashkil etilgan matbuot anjumanida mas'ullar qator muhim savollarga javob berishdi. Xususan:
1. Kvotalar qaysi prinsipga asosan shakllantiriladi?
Bu yil kvotalar soni umumiy jihatdan oshgan bo‘lsa ham, ayrim yo‘nalishlarda kamaygani va umuman davlat granti uchun kvotalar kamaygani aytilmoqda. Mas'ullarning ma'lumot berishicha, kvotalarni shakllantirish uchun Iqtisodiyot va sanoat vazirligining tahlillari va tavsiyalariga tayaniladi. Xususan, sohalarning rivojlanishi, kadrlar sonining ortishi yoki kamayishi, ayrim kasblarning dolzarbligi yo‘qolishi va yangi kasblar paydo bo‘lishiga oid prognozlar asosida kvotalar shakllantiriladi. Davlat grantining kamayishiga oid savolga esa shunday mazmunda javob bo‘ldi: “Davlat qaysi sohaga grant ajratishni maqsadga muvofiq topsa, ya'ni malakali kadrlar ko‘proq kerak deb hisoblasa, o‘sha sohalarga grant ajratadi”.
2. Bu yil yangi ochilgan filiallarga qabul bo‘ladimi?
Bo‘ladi. Ular uchun alohida kvotalar bugun-erta e'lon qilinadi. Ya'ni ushbu filiallar ham alohida OTMdek alohida kvota bilan talabalar qabul qiladi.
3. Nima uchun TDYuUning Toshkent viloyatidagi filialiga faqat Toshkent shahri va viloyati propiskasi bilan qabul qilinadi?
Ushbu filialning boshqa filiallardan farqi uning ixtisoslashtirilganligi bo‘lib, u huquqbuzarlik profilaktikasi va jamoatchilik tartibini saqlash sohalariga kadrlar yetishtirib berishga ixtisoslashtirilgan oliy ta'lim muassasasidir. Bir so‘z bilan aytganda, oliy yuridik ma'lumotga ega uchastka nozirlari, ularning yordamchilari, milliy gvardiya xodimlarini tayyorlaydi. Uchastka noziri o‘zi yashab turgan joyni yaxshi bilishi maqsadga muvofiq. Shu sababli abituriyent Toshkent shahri va viloyatidan bo‘lishi kerak degan shart qo‘yilgan. Nega aynan Toshkent uchun ochildi bu filial? Hozirda Toshkent shahri uchun bunday kadrlar zarur, ularga ehtiyoj yuqori. Chunki Toshkent – poytaxt, aholi ko‘p, mamlakatning yuzi, turizm eshigi va hokazo degan sabablar ko‘rsatildi.
4. Abituriyentlarga qoralama uchun qog‘oz nega atigi 1 varaq? Ko‘paytirishning iloji bormi?
