Angliya Xorvatiyaga 7 ta gol urdi, Yamalda noodatiy seriya
|11:224 88214 min
Millatlar ligasi guruh bosqichida 3-tur doirasida navbatdagi oʻyinlar boʻlib oʻtdi: Modrich Angliyaga qarshi oʻyindan keyin uzr soʻradi, Yamal qatorasiga uchinchi oʻyinda tezkor gol urdi, Shveysariya va Shimoliy Makedoniya oʻyinini it toʻxtatib qoʻydi.
Foto: IMAGO/Jerko Grubisic Xorvatlar shu vaqtgacha oʻz uyida 5 tadan koʻp gol oʻtkazmagandi, bu safar 7 ta gol oʻtkazildiFoto: IMAGO/Jerko Grubisic Xorvatlar shu vaqtgacha oʻz uyida 5 tadan koʻp gol oʻtkazmagandi, bu safar 7 ta gol oʻtkazildi
Xorvatiya avlodlar almashinuvi va jamoaning soʻnggi oʻn yillikdagi yutuqlarining asosiy ijodkori boʻlgan Zlatko Dalichning ketishini ogʻriqli oʻtkazmoqda.
Inglizlar nomdor raqibga qarshi safarda kechgan oʻyinda juda oson gʻalabaga erishdi. Barchasi birinchi boʻlimdayoq hal boʻldi. Avvaliga «Siti» himoyachisi Yoshko Gvardiol qatorasiga ikkinchi oʻyinda golga olib keluvchi xatoga yoʻl qoʻydi. Maydon markazida toʻpni undan olib qoʻygan mehmonlar qarshi hujum uyushtirdi va bu hujum Bellinghem Harri Keynni golli vaziyatga chiqarishi bilan yakunlandi.
Keyn shu kuni dubl qayd etdi va yana bir golga uzatma berdi, Jud Bellinghemda 1+3, Bukayo Sakada 2+1, Entoni Gordon esa 1+1. Zaxiradan tushgan Morgan Rodjers esa 87-daqiqada yakuniy hisobni oʻrnatdi 7:0.
Inglizlar ustozi Tomas Tuhel yettinchi goldan keyin xorvatlar ustozi Slaven Bilichning oldiga borib, uni qoʻllab-quvvatladi.
Oʻyindan keyin xorvatlar sardori Luka Modrich muxlislardan uzr soʻradi: «Kurashsiz, fidokorliksiz, follarsiz, jamoaviy birliksiz. Men bu yerda 20 yildan beri oʻynayman va aytishim kerakki, oʻyindan keyin birinchi marta uyalyapman. Yutqazishni qabul qilish mumkin – ular kuchliroq edi, lekin bunday tarzda yutqazish va oʻz obroʻngizni mana shunday tarzda yoʻqotishga yoʻl qoʻyib boʻlmaydi. 20 yil ichida birinchi marta chindan ham uyalyapman. Bir-birimizni barmogʻimiz bilan koʻrsatishimiz shart emas, har doimgidek buni birgalikda boshdan oʻtkazishimiz kerak. Oʻyinlarda katta farq bilan magʻlub boʻlganmiz, ammo bu oʻyindan keyingi his-tuygʻular butkul boshqacha. Men hech qachon bunday ahvolga tushmaganman. Uzr soʻrayman».
Bu Angliya milliy jamoasining soʻnggi uch yillikdagi eng yirik gʻalabasi boʻldi. Jamoa 2023-yilda Yevro-2024 saralashida Shimoliy Makedoniya darvozasiga ham javobsiz 7 ta gol yoʻllagandi. Angliya XXI asrda faqat ikki bor bundan yirikroq hisobda gʻalaba qozongan: 2013 va 2021-yillarda San-Marinoga qarshi oʻyinlarda mos ravishda 8:0 va 10:0 hisoblarida. Ammo raqiblar darajasi butkul farq qiladi.
Mavzuga oid
Xorvatiyada oldin ham yirik magʻlubiyatlar boʻlgan. Ammo bunday katta farqdagisi birinchi marta. Shu vaqtgacha bolqonliklarning eng yirik magʻlubiyati 2018-yil sentabrida safarda Ispaniyaga qarshi oʻyinda boʻlgandi – 0:6.
Bu oʻyinda stadionga atigi 6342 nafar muxlis tushgandi, ammo ulardan aksari bolalar edi – Millatlar ligasi oʻtgan mavsumi chorakfinalida Fransiyaga qarshi oʻyinda roʻy bergan tartibsizliklar tufayli xorvatlarga oʻz uyidagi oʻyinlarda muxlislar kirishi boʻyicha cheklovlar joriy etilgan, ammo futbol akademiyalaridagi 14 yoshgacha boʻlgan bolalar stadionga tushishiga ruxsat berilgan.
Keyn qatorasiga oltinchi oʻyinda gol urmoqda: u bu oraliqda jami 8 gol urgan. Mavsum startidan buyon oʻtkazilgan jami 10 oʻyinda (klub va terma jamoada) Harri urgan gollar soni 10 tani tashkil etmoqda. U Angliya milliy jamoasi tarixidagi eng yaxshi toʻpurar. Va faqat olti futbolchi oʻz milliy jamoasi uchun undan koʻra koʻproq gol urishgan: Krishtianu Ronaldu (146), Lionel Messi (125), Ali Dayi (108), Sunil Chetri (95), Romelu Lukaku (94) va Robert Levandovski (92).
Gordon xalqaro tanaffusdagi uchala oʻyinda ham gol urdi. Mavsumni juda yaxshi boshlagan ushbu chap qanot vingeri Millatlar ligasi oʻyinlarida 3+1 koʻrsatkichini qayd etdi, shuningdek, «Barselona» safida 4 ta assist amalga oshirgan.
Ispaniya Chexiyaga qarshi oʻyinda ham gʻalaba qozondi – 3:1. Lamin Yamal oʻz odatiga koʻra oʻyin startida hisobni ochdi: oldingi ikki oʻyinda ikki daqiqa ichida gol urgan futbolchi bu safar biroz choʻzib yubordi va faqat 6-daqiqaga kelib oʻz uslubida olis burchakka zarba bergan holda darvozani ishgʻol etdi. 35-daqiqada Rodri ham gol urdi va muxlislar yirik hisobga tayyorlana boshladi, ammo chexlar ikkinchi boʻlimda bitta javob golini urishga erishdi.
79-daqiqada hisob tenglashgandi ham: David Rayya toʻpni qoʻlidan chiqarib yubordi va Rayan Naderi bu vaziyatdan foydalandi. Ammo u hujumda fol ishlatgan deb topildi va gol bekor qilindi.
Chexlar sardori Ladislav Kreychi ushbu epizodda hakam bilan bahslashgani uchun sariq kartochka oldi, biroz oʻtib u yana bir bor ogohlantirildi va maydonni erta tark etishga majbur boʻldi. Ispanlar esa oʻn kishiga qarshi oʻyinda navbatdagi golni urdi – zaxiradan oʻyinga qoʻshilgan Mikel Merino oʻz anʼanasiga sodiq qolib, soʻnggi daqiqalarda gol urdi.
Ispaniya asosiy vaqtda yutqazmaslik boʻyicha seriyasini 41 oʻyinga yetkazdi. Bu seriya 2024-yil martidan buyon davom etib kelmoqda. Jamoaning soʻnggi magʻlubiyati Kolumbiyaga qarshi oʻrtoqlik oʻyinida qayd etilgan (0:1). De la Fuente shogirdlari oʻrtada Millatlar ligasi finalida Portugaliyadan ham magʻlubiyatga uchragan, ammo oʻshanda asosiy vaqt 2:2 hisobida yakunlangan, gʻolib penaltilar seriyasida aniqlangandi (3:5).
Yamal qatorasiga uchinchi oʻyinda gol urmoqda. Alohida jihati: Angliya va Xorvatiyaga qarshi oʻyinlarda 2-daqiqada hisobni ochgandi, endi 6-daqiqada gol urdi. U bu mavsum startida klub va terma jamoadagi 11 oʻyinda 12 gol urdi va 7 assist amalga oshirdi.
Bu Chexiya uchun Millatlar ligasida qatorasiga uchinchi magʻlubiyat boʻldi. Oldingi turlarda chexlar Xorvatiya (1:2) va Angliya (0:2)dan magʻlub boʻlgandi, endi Ispaniyaga ham kuchi yetmadi.
Ispanlar hozircha yoʻqotishsiz davom etmoqda, Angliya – asosiy taʼqibchi.
6-oktabr. Xorvatiya – Ispaniya, Angliya – Chexiya. 12-noyabr. Chexiya – Ispaniya, Angliya – Xorvatiya. 15-noyabr. Xorvatiya – Chexiya, Ispaniya – Angliya.
Ushbu guruhdagi markaziy oʻyinda ikki jamoa darvozaboni navbati bilan xatoga yoʻl qoʻydi. Avvaliga Kobel Vipotnikning u qadar kuchli boʻlmagan zarbasini oʻtkazib yubordi. Keyin esa Oblak oʻz hamkasbini qoʻllab-quvvatlashga qaror qildi va oʻziga kelgan toʻpni qoʻllari orasidan oʻtkazib yubordi. Bu vaziyatda toʻp himoyachi Yanje orqali darvozaga kelgandi. Lekin Shveysariya oʻyin borasida yaqqol ustunlikka ega edi va bu hisobda ham oʻz aksini topdi – boʻlim oxirida Ndoy gʻalaba golini urdi. Murat Yakin shogirdlari startdagi uch turda 100 foizlik natija qayd etgan holda guruhda peshqadamlik qilishda davom etmoqda.
Shotlandiya safarda Shimoliy Makedoniyani qiyinchiliksiz magʻlub etdi – 2:0. Mezbonlarda deyarli qarshilik koʻrsata olishmadi: 7-daqiqada «Sassuolo» hujumchisi Kiron Boui jarima maydoni tashqarisidan ajoyib zarba berdi va milliy jamoa safidagi debyut golini nishonladi, 69-daqiqada Jon Makginn penaltidan aniq foydalanib, yakuniy hisobni oʻrnatdi. Shotlandlar shu kuni yirik gʻalaba bilan ortga qaytishi ham mumkin edi, ammo makedoniyaliklar posboni Stole Dimitriyevski beshta seyv amalga oshirib, bunga yoʻl qoʻymadi. Oʻyin oxirida shotlandlar safida Skott Makkenna qizil kartochka olib maydonni tark etdi, ammo bu natijaga taʼsir koʻrsatmadi.
Maydonga chiqib ketgan it ham makedonlarga yordam bera olmadi: lekin u tufayli oʻyin bir necha daqiqaga toʻxtab qoldi.
6-oktabr. Shotlandiya – Sloveniya, Shveysariya – Shimoliy Makedoniya. 13-noyabr. Shotlandiya – Shimoliy Makedoniya, Sloveniya – Shveysariya. 16-noyabr. Shimoliy Makedoniya – Sloveniya, Shveysariya – Shotlandiya.
Finlandiya Albaniya bilan oʻyinda kambek amalga oshirdi – 2:1. Avvaliga Rey Manay burchak zarbasidan keyin mehmonlarni hisobda oldinga olib chiqqandi. Ammo albanlar birinchi boʻlim oʻrtalarida darvozabon Etrit Berishaning qoʻpol xatosidan keyin bir kishi kam boʻlib qolishdi – darvozabon jarima maydoni tashqarisiga chiqib keldi va raqib futbolchisini yiqitib, qizil kartochka oldi.
Shundan keyin finnlar oʻyin tizginini oʻz qoʻliga olishdi. Oʻyin davomida yarimhimoyachi Leo Valta jarima zarbalaridan dublga erishdi. Avvaliga 26-daqiqada mehmonlarning yangi darvozaboni Alen Sherri oʻzi turgan joyga kelgan toʻpni oʻtkazib yubordi, ikkinchi boʻlimda esa toʻpga sakrashda kechikdi. Darvozabonlarning xatolari albanlarga qimmatga tushdi.
Belarus San-Marinoga hech qanday imkon qoldirmadi – 4:0. Barcha gollar ikkinchi boʻlimda urildi – toʻliq ustunlikka erishilganiga qaramay, hisob faqat 46-daqiqada ochildi. Ammo shundan keyin mezbonlarni toʻxtatib boʻlmadi: yakunda Artyom Konsevoy dubl rasmiylashtirdi, himoyachi Kirill Pechenin assistlar boʻyicha het-trikka erishdi.
Belarus oʻyindan oʻyinga natijalarni yaxshilamoqda: jamoa turnirni Albaniya bilan oʻyindagi magʻlubiyatdan (0:2) boshlagandi, ikkinchi turda finnlar bilan durang qayd etildi (0:0), endi esa kutilganidek guruh autsayderi tor-mor etildi. Shu bilan birga, Viktor Goncharenko jamoasi hamon guruhda uchinchi oʻrinda, San-Marino esa D ligasiga qaytishi tayin.
6-oktabr. Albaniya – San-Marino, Belarus – Finlandiya. 12-noyabr. Albaniya – Finlandiya, San-Marino – Belarus. 15-noyabr. Belarus – Albaniya, Finlandiya – San-Marino.
S ligasi, 4-guruh
Islandiya – Bolgariya 3:0 Gollar: Oskarsson, 37 (1:0). Oskarsson, 60 (2:0). Ellertsson, 90 (3:0) Aniq ijro etilmagan penalti: Oskarsson, 84’ Islandiya: Valdimarsson, Gunnarsson (Gretarsson, 46), Magnusson, Ellertsson, Anderson, Baldursson (Palsson, 62), Yohannesson, Torsteynsson (G. Sigurdsson, 62), A. Sigurdsson (Gudyonsen, 46), Haraldsson (Tomasson, 82), Oskarsson Bolgariya: Naumov, K. Dimitrov, Velkov, Velkovski, Turitsov, Gruyev (Senov, 55), Krayev, Rusev (Panayotov, 67), L. Petkov (M. Petkov, 55), Iliyev (Nikolov, 83), Chandarov (Z. Dimitrov, 67) Ogohlantirishlar: Magnusson, 4. Ellertsson, 32 – L. Petkov, 10. Velkovski, 27. Iliyev, 59. M. Petkov, 81
Islandiya Bolgariyani yirik hisobda taslim etdi – 3:0. Orolliklar safida «Real Sosiyedad» hujumchi Orri Ouskarsson oʻyin qahramoniga aylandi: barcha gollarda ishtirok etdi, shu bilan birga penaltini urolmadi. Oʻtgan turda Lyuksemburgga qarshi oʻyinda ham gol va pas qayd etgan Ouskarsson xalqaro tanaffusdagi eng sermahsul futbolchilardan biri boʻlmoqda. Qatorasiga ikkinchi oʻyinda 3:0 hisobida gʻalaba qozongan Islandiya guruh peshqadami boʻlib oldi.
Estoniya Lyuksemburg ustidan minimal gʻalabaga erishdi – 1:0. 5-daqiqada urilgan gol oʻyin taqdirini hal qildi: bu vaziyatda mehmonlar darvozaboni seyv ijro etgandi, ammo estonlar yarimhimoyachisi Rasmus Peetson toʻpga birinchi boʻlib yetib keldi. Shu kuni Lyuksemburg darvozaboni Antoni Moris sakkiz bor jamoasini gollardan qutqarib qoldi va magʻlubiyatga qaramay, oʻyinning eng yaxshi futbolchisi boʻldi.
