Oʻzbekiston prezidenti matbuot kotibi Sherzod Asadov taʼlim sohasidagi bugungi yangilanishlarning asosiy mazmun-mohiyati boʻyicha tushuncha berdi.
“Prezidentimizning ikki vazirlikni birlashtirishdan koʻzlagan asosiy gʻoyasi quyidagilardan iborat:
Taʼlim va ilm-fan vazirligi barcha bogʻcha, maktab, professional va oliy taʼlim muassasalari faoliyatini tashkil etishi va ularning operatsion jarayonlari uchun masʼul boʻlishi, taʼlim faoliyatiga qoʻyiladigan talablarni belgilashi, akkreditatsiyalash va litsenziyalash bilan shugʻullanishi kerak;
Taʼlim sifatini taʼminlash milliy agentligi oʻquv dasturlari, qoʻllanmalar va metodik materiallarni ishlab chiqadigan oʻziga xos laboratoriya vazifasini bajarishi, ularni amaliyotga joriy etishi, natijalarini kuzatishi va aniqlangan kamchiliklar asosida takomillashtirib borishi kerak. Bu ishlar prezidentimiz belgilab bergan "oʻzbek maktabi bitiruvchisining portreti"ga tayangan holda olib boriladi;
Prezident administratsiyasi va uning huzurida tashkil etiladigan alohida ishchi guruh yangi vazirlikning tuzilmasini ishlab chiqadi, ish jarayonlarini qayta koʻrib chiqadi, ularni takomillashtirish yuzasidan takliflar tayyorlaydi hamda islohotning umumiy strategiyasini belgilaydi;
oliy taʼlimda davlat aralashuvini keskin qisqartirish, oliygohlar mustaqilligini kengaytirish va nodavlat sektor uchun imkoniyatlar yaratish lozim, qaysi oliygoh sifatli taʼlim berayotganini esa erkin raqobat va bozor talabi koʻrsatishi kerak”, deya maʼlum qildi Sherzod Asadov.
Eslatib oʻtamiz, Oʻzbekiston prezidentining farmoni bilan Maktabgacha va maktab taʼlimi vazirligi hamda Oliy taʼlim, fan va innovatsiyalar vazirligi yagona Taʼlim va ilm-fan vazirligi sifatida qayta tashkil etildi.
Shuningdek, Prezident administratsiyasi huzurida taʼlim strategiyasi boʻyicha maxsus ishchi guruh tashkil etilishi maʼlum qilindi. Unga jamoatchilik asosida tadbirkor Zafar Hoshimov rahbarlik qiladi.
Guruh tarkibiga taʼlim muassasalarini yoʻlga qoʻyish va samarali tizimlar yaratishda tajribaga ega tadbirkorlar, soha mutaxassislari, olimlar hamda xalqaro ekspertlar jalb qilinadi.
