Toshkentga elektrobus olib kelindi. U qisqa masofali yo‘nalishlardan biriga biriktiriladi

“Toshshahartransxizmat” AJ va Belarusning “Belkommunmash” kompaniyasi o‘rtasidagi o‘zaro memorandumga asosan poytaxt jamoat transporti harakat tarkibida elektrobuslarni sinov tariqasida yurgizish rejalashtirilgan edi. 

Shunga muvofiq, bir dona ana shu turdagi transport vositasi Toshkent shahriga keltirildi, deb xabar qilmoqda “Toshshahartransxizmat”. 

Bunga qadar “Toshshahartransxizmat” tomonidan elektrobusni yo‘nalishga chiqarish bilan bog‘liq tashkiliy ishlar amalga oshirildi. Xususan, 2ta joyda elektrobusni quvvatlash shoxobchalari o‘rnatildi. 

Yaqin kunlarda elektrobusni qisqa masofali yo‘nalishlardan biriga biriktirish rejalashtirilmoqda.

Maxsus komissiya ushbu elektrobus bilan bog‘liq barcha holatlarni to‘liq o‘rganib chiqadi. Xususan, O‘zbekistonning issiq iqlimida elektrobusning harakatlanish imkoniyatlari, yo‘lovchilar sog‘ligiga uning ta'siri va boshqa jihatlar atroflicha tahlil qilinadi, deyiladi xabarda.