Shvetsiyalik iqlim o‘zgarishiga qarshi kurash faoli, 16 yoshli Greta Tunberg Birlashgan Millatlar Tashkiloti minbarida turib dunyo rahbarlarini iqlim o‘zgarishiga qarshi kurashishga qodir emaslikda va uning «bolaligini o‘g‘irlashda» aybladi.
«Bunga qanday haddingiz sig‘di?»
«Bularning bari noto‘g‘ri. Men bu yerda bo‘lmasligim kerak edi. Okeanning narigi tomonidagi maktabga qaytishim kerak. Bas, sizlar biz yoshlarga umid bilan murojaat qilyapsizlar. Bunga qanday haddingiz sig‘di? Sizlar quruq so‘zlaringiz bilan orzularim va bolaligimni o‘g‘irladingiz. Yanayam men omadlilardan biriman. Odamlar azoblanyapti, odamlar o‘lyapti. Butun boshli ekotizimlar barbod bo‘lyapti. Biz ommaviy qirilishning boshlanishida turibmiz. Sizlar esa faqat pullar haqida gapirasizlar va o‘sayotgan iqtisodiyot haqida ertaklar aytasizlar. Bunga qanday haddingiz sig‘yapti?», dedi u BMTning iqlim masalalariga bag‘ishlangan sammitida.
