09:00 / 30.10.2019
0
1511
«KAFOLAT sug'urta kompaniyasi» АЖнинг жаҳон суғурта бозорига интеграциялашуви

Суғурта хизматлари иқтисодиётни турли хил молиявий хатарлардан ҳимоя қилувчи воситалардан биридир. Мамлакатимиз раҳбарининг  ташаббуси билан жамият ҳаётининг барча соҳаларида кенг кўламли ислоҳотлар амалга оширилмоқда. Шу жумладан иқтисодий соҳадаги ижобий ўзгаришлар натижасида суғурта йўналишининг ривожланиши учун ҳам қулай имкониятлар яратилмоқда.

Ўзбекистон Республикаси Президенти томонидан 2019 йил 2 августда қабул қилинган ПҚ-4412-сонли «Ўзбекистон Республикасининг суғурта бозорини ислоҳ қилиш ва унинг жадал ривожланишини таъминлаш чора-тадбирлари тўғрисида»ги  Қарори  ҳамда Ўзбекистон Республикаси Президентининг 2019 йил 13 августдаги ПФ-5780-сонли «Хусусий мулкни ҳимоя қилиш ва мулкдорлар ҳуқуқларининг кафолатларини кучайтириш, тадбиркорлик субъектларининг молиявий ресурслар ва ишлаб чиқариш инфратузилмасидан фойдаланиш имкониятларини кенгайтириш тўғрисида»ги Фармони фикримизнинг далилидир.

Мазкур ҳужжатлар ижросини таъминлаш мақсадида «KAFOLAT sug'urta kompaniyasi» АЖ томонидан учрашувлар ташкил этилмоқда, жумладан Қорақалпоғистонда 2 та, Сурхондарёда 2 та, Қашқадарёда 2 та, Жиззахда 3 та, Сирдарёда 2 та, Самарқандда 2 та, Навоийда 2 та, Бухорода 2 та,  Хоразмда 2 та  туманда учрашувлар бўлиб ўтди.

Компания томонидан тижорат банклари билан ҳам ҳамкорлик қилинмоқда. Хусусан, тижорат банклари, «KAFOLAT sug'urta kompaniyasi» АЖ, тадбиркорлик фаолиятини қўллаб-қувватлаш давлат жамғармаси, кичик бизнес ва тадбиркорликни ривожлантириш агентлиги ишини мувофиқлаштирувчи автоматлаштирилган тизим ишлаб чиқилди. Бу тадбиркор учун бир жойнинг ўзидан барча хизматларни онлайн олиш имконини беради. Бугунги кунда Сурхондарё вилоятининг Денов ва Сирдарё вилоятининг Ховос туманларида автоматлаштирилган тизим синовдан ўтказилди.

«KAFOLAT sug'urta kompaniyasi» АЖ Ўзбекистон суғурта бозорини етакчи суғурта бозорларида танитиш ҳамда ҳалқаро суғурта оламида ўз ўрнига эга бўлиш мақсадида қатор ишларни амалга оширди.

Компания Лондонда жойлашган «International Underwriting Association of London» (IUA) Ҳалқаро ассоциациясининг Ўзбекистон суғурта бозори иштирокчиларидан ягона аъзосидир.

Бугунги кунда «KAFOLAT sug'urta kompaniyasi» АЖ «Abu Dhabi National Insurance Company», «Oman Insurance Company», «Insurance House» (БАА), «Polish RE» (Польша), Lloyd`s Syndicate Canopius (CNP 4444), «Direct Insurance London Market Plc» (Буюк Британия), «Скор Перестрахование», САО «ВСК» (Россия), «Нефтяная страховая компания» АЖ (Козоғистон), «Barents Reinsurance SA» (Люксембург), «Ace Insurance Pvt. Ltd.» (Хиндистон) ва бошқа шу каби дунёнинг нуфузли суғурта ташкилотлари билан қайта суғурта йўналишида хамкорлик алоқаларини ўрнатган.

Компания Республикага валюта олиб киришда суғурта бозорида энг юқори кўрсаткичларни қайд этмоқда, 2019 йил 9 ойи мобайнида 2,4 млн. АҚШ долларига тенг суғурта экспорти амалга оширилди (қайта суғурта орқали хорижий рисклар қабул қилинди).

2019 йил 1 октябрь ҳолатига кўра, компаниянинг устав капитали 35,3 млрд. сўмни ташкил этди.

Жисмоний ва юридик шахслар билан 668,3 мингта суғурта шартномалари имзоланиб, 118,4  млрд. сўм суғурта мукофоти йиғилди, ушбу кўрсаткич ўтган йилга нисбатан 140,9 фоизга кўп. Суғурта мукофотлари тушумининг асосий қисми, яъни 76,4 фоизи – 90,5 млрд. сўм компаниянинг минтақавий филиаллари томонидан амалга оширилди. Компания томонидан тузилган суғурта шартномалари бўйича қабул қилинган суғурта мажбурияти ҳажми 67,5 трлн. сўмни ташкил этган.

Ҳисобот даврида 5732 суғурта ҳодисалари бўйича мижозларга 24 млрд. сўмдан ортиқ суғурта қопламалари амалга оширилди. Тўланган суғурта қопламаларининг асосий қисми мажбурий суғурта турларига тўғри келади.

Компания кенг географик жойлашувга эга бўлиб, бугунги кунда филиаллар тармоғи 227тани ташкил этмоқда, яъни 15 та филиал, 60 та бўлим ва 152 та суғурта марказлари мижозларга хизмат кўрсатмоқда.

Бугунги кунда Ўзбекистон суғурта бозорида фаолият юритаётган 30 дан ортиқ суғурта компанияларидан иккитаси халқаро рейтингга эга бўлса, шундан биттаси – «KAFOLAT sug'urta kompaniyasi» акциядорлик жамиятидир. Fitch Ratings халқаро нуфузли рейтинг агентлиги «KAFOLAT sug'urta kompaniyasi» АЖ рейтингини «ВВ-», «Барқарор» истиқболини жорий йилнинг октябрь ойида қайта тасдиқлади.

«SAIPRO» ахборот-рейтинг агентлиги «KAFOLAT sug'urta kompaniyasi» AJ нинг «uzA++» (энг юқори молиявий кўрсаткич) рейтингини тасдиқлади.

Рейтингларнинг тасдиқланиши компания учун янги маҳаллий ва хорижий инвестицияларни жалб этиш, халқаро молия институтлари билан истиқболли ҳамкорлик алоқалари кўламини янада кенгайтиришга имкон яратади.

Компаниянинг бош мақсади – мижозлар олдидаги мажбуриятларни тўлиқ ва сифатли бажариш ва бу орқали ижтимоий йўналтирилган Ўзбекистон иқтисодиётига муносиб ҳисса қўшишдан иборат.

«KAFOLAT sug'urta kompaniyasi» АЖ Матбуот хизмати

Ушбу хабарга фикрингизни билдиринг. Бунинг учун авторизациядан ўтишингиз керак!
Top