Po‘lat Bobojonov: «Jasliq» koloniyasining boshqa tashkilotlarga berilishi o‘z vaqtida hal qilinadi»

O‘zbekiston Elektron ommaviy axborot vositalari milliy assotsiatsiyasining «Zarafshon» zali Media hall’ida «Yangi O‘zbekiston - yangi saylovlar» munozara klubining navbatdagi tadbiri bo‘lib o‘tmoqda.

«Qonun ustuvorligi va inson manfaatlarini ta'minlash - mamlakat taraqqiyoti va xalq farovonligining garovi» mavzusidagi tadbirda sud hokimiyati mustaqilligining konstitutsiyaviy tamoyiliga rioya etilishini ta'minlash, sud-tergov jarayonida fuqarolarning huquq va erkinliklari kafolatlarini kuchaytirish, advokatning dalillar to‘plash va taqdim etish huquqini kengaytirish, ularning kafolatlarini ta'minlash, jinoiy va jinoiy-protsessual qonun hujjatlarini qayta ko‘rib chiqish, shu jumladan, iqtisodiy jinoyatlar sohasidagi normalarni erkinlashtirish kabi masalalar yuzasidan fikr almashilmoqda.

O‘zbekiston ichki ishlar vaziri Po‘lat Bobojonov tadbirda Qoraqalpog‘iston Respublikasida joylashgan Jasliq koloniyasi bo‘yicha qo‘shimcha ma'lumot berdi.

«Odamlar o‘rtasida yomon nom qozongan 19-Jasliq koloniyasi yopilgani hammaga ma'lum. Hozirgi vaqtga kelib, bu koloniyada joylashgan barcha mahkum - 361 nafar shaxs boshqa koloniyalarga ko‘chirildi. Ular faqat bitta koloniyaga emas, balki bir nechta koloniyaga ko‘chirildi. Bu mahkumlar uchun hamma sharoit yaratib berildi. Jasliq koloniyasining boshqa tashkilotlarga berilishi o‘z vaqtida hal qilinadi», - deydi Po‘lat Bobojonov.