Poʻlat Bobojonov boshqa ishga oʻtishi munosabati bilan prezidentning kadrlar boʻyicha maslahatchisi oʻrinbosari lavozimidan ozod etildi. Bu haqda prezident matbuot kotibi Sherzod Asadov xabar qildi.
Muqaddam 7,5 yil mobaynida ichki ishlar vaziri boʻlgan Bobojonov 2025-yil martidan buyon prezident maslahatchisi Gʻofurjon Mirzayevning oʻrinbosari edi.
Bugun Gʻofurjon Mirzayev Oʻzbekiston bosh vaziri oʻrinbosari – Oʻzbekiston mahallalari uyushmasi raisi etib tayinlandi.
Manbalarga koʻra, Bobojonov endi uyushmada unga oʻrinbosarlikni davom ettiradi.
Shuningdek, iqtisodiyot va moliya vaziri oʻrinbosari Samandar Sadullayev uyushma raisining birinchi oʻrinbosari boʻlgan.
Kadrlar boʻyicha maslahatchi lavozimi tugatildi
Prezident administratsiyasi tuzilmasini maqbullashtirish ishlari doirasida prezidentning kadrlar boʻyicha maslahatchisi lavozimi va uning boʻlinmasi tugatildi.
Shuningdek, davlat mukofotlari va geraldika sohasida yagona davlat siyosatini yuritish, mahalliy davlat hokimiyati organlari bilan yaqin hamkorlik qilish hamda ularning faoliyatini muvofiqlashtirish Komplayens xizmatining qoʻshimcha faoliyat yoʻnalishi etib belgilandi.
Mahalla instituti faoliyati samaradorligini yanada oshirish esa Prezidentning vakillik organlari, nodavlat notijorat tashkilotlari va yoshlar masalalari boʻyicha maslahatchisi boʻlinmasining qoʻshimcha faoliyat yoʻnalishi sifatida belgilandi.
