Hoji Abdulaziz Abdurasulov uy-muzeyi Samarqand davlat muzey-qo‘riqxonasining filiali sifatida tashkil etiladi

Vazirlar Mahkamasining “Hoji Abdulaziz Abdurasulov uy-muzeyi faoliyatini tashkil etish to‘g‘risida”gi qarori loyihasi muhokama uchun joylashtirildi.

Samarqand viloyati hokimligi, Madaniyat vazirligining Samarqand shahrida Hoji Abdulaziz Abdurasulov uy-muzeyini Samarqand davlat muzey-qo‘riqxonasining filiali sifatida tashkil etish to‘g‘risidagi takliflari ma'qullanishi mumkin.

Samarqand viloyati hokimligi Madaniyat vazirligi bilan birgalikda:

Samarqand shahri, Ko‘kmasjid mahallasi, Hoji Abdulaziz Abdurasulov ko‘chasi, 9-uy manzilida joylashgan binoni Samarqand davlat muzey-qo‘riqxonasiga operativ boshqarish huquqi asosida bepul berishni hamda binoning kadastr hujjatlarini rasmiylashtirishni;

Hoji Abdulaziz Abdurasulov uy-muzeyini Samarqand shahri, Ko‘kmasjid mahallasi, Hoji Abdulaziz Abdurasulov ko‘chasi, 9-uy manzilida joylashgan binoga joylashtirishni;

tashkil etilayotgan muzeyning asosiy vazifalaridan kelib chiqib, muzey to‘g‘risida nizomni ishlab chiqish va tasdiqlashni;

muzeyning shtatlar jadvali belgilangan tartibda ishlab chiqilishi va tasdiqlanishi hamda uning malakali kadrlar bilan to‘ldirishni;

muzeyda madaniy-ma'rifiy tadbirlar, Hoji Abdulaziz Abdurasulov boy ijodini o‘rganish, davra suhbatlari, ijodiy uchrashuvlar tashkil etishni;

muzeyga zamonaviy interfaol axborot-texnologiyalarni joriy etishni ta'minlaydi.

Madaniyat vazirligi:

manfaatdor vazirliklar va idoralar bilan birgalikda muzey ekspozitsiyasini muzey ashyolari bilan to‘ldirish choralarini ko‘radi;

Turizmni rivojlantirish davlat qo‘mitasi, Samarqand viloyat hokimligi bilan birgalikda muzeyga sayyohlarni keng jalb etish choralarini ko‘radi.

Belgilab qo‘yilishicha:

muzeyga shtat birliklarini ajratish hamda xodimlariga ish haqi to‘lash Madaniyat vazirligi tizimidagi muzeylar uchun belgilangan tartibga muvofiq;

muzeylarni saqlash xarajatlari, uning o‘z daromadlari, mahalliy budjeti mablag‘lari va qonun hujjatlarida ta'qiqlanmagan boshqa manbalar hisobidan amalga oshiriladi.