Sud raislarining sudyalarga ish taqsimlash vakolati bekor qilinadi. Tegishli qonun Senatda ma'qullandi

Yangi qonun sudlarga manfaatdor shaxslar ta'sir ko‘rsatishining oldini olishga qaratilgan.

Oliy Majlis Senatining ikkinchi yalpi majlisida «Sud ishlarini yuritish tartibi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida»gi qonun ma'qullandi, deb xabar beradi Kun.uz muxbiri.

Bu qonun «Sudlar to‘g‘risida»gi, «Xo‘jalik yurituvchi sub'yektlar faoliyatining shartnomaviy-huquqiy bazasi to‘g‘risida»gi qonunlari, Soliq kodeksi, shuningdek, Fuqarolik va Iqtisodiy protsessual kodekslari va Ma'muriy sud ijrochiligi to‘g‘risidagi kodeksiga o‘zgartish va qo‘shimchalar kiritishni nazarda tutadi.

Masala yuzasidan senator Enaxon Siddiqova so‘zga chiqdi.

«O‘zbekiston prezidentining 2019 yil 20 noyabrdagi qaroriga muvofiq, «Sudlar to‘g‘risida»gi qonunga tumanlararo, tuman (shahar) sudlari raislarining vakolatidan sudyalar o‘rtasida ishlarni taqsimlash bilan bog‘liq normalarni chiqarib, ishlarni sudyalarga faqat avtomatik ravishda taqsimlanishini ko‘zda tutuvchi o‘zgartirishlarni kiritish belgilangan edi.

Amaldagi tartib sudlarda ishlarni elektron tizimdan foydalangan holda inson omillarisiz avtomatik ravishda taqsimlashni cheklab qo‘yayotgan edi. Shu bois qonun bilan sudlov hay'atlari va sudlar raislarining ishlarni sudyalar o‘rtasida taqsimlash vakolatini bekor qilish, buning o‘rniga sudlarda ishlarni tasodifiy taqsimlash prinsipi asosida avtomatik taqsimlash haqidagi qoidani kiritish nazarda tutilmoqda», – dedi Enaxon Siddiqova.

Qonunga asosan, sudlarda ishlarni avtomatik tarzda taqsimlash tartibini belgilash vakolati Oliy sud rayosatiga berilmoqda.

Ta'kidlanishicha, «Sudlar to‘g‘risida»gi qonunga kiritilayotgan o‘zgartirish sud ishi yurituvini soddalashtirishga, sud muhokamasining natijasiga manfaatdor shaxslar ta'sir ko‘rsatishining oldini olishga, sudlar tomonidan asoslantirilgan va adolatli qarorlar chiqarilishiga xizmat qiladi.

Senatorlarning fikricha, «Xo‘jalik yurituvchi sub'yektlar faoliyatining shartnomaviy-huquqiy bazasi to‘g‘risida»gi qonunga kiritilayotgan o‘zgartirishlar natijasida xo‘jalik yurituvchi sub'yektlar o‘rtasidagi nizolarni tezkor hal qilishga erishiladi.

2020 yil 1 fevraldan boshlab yuridik shaxslar tomonidan da'vo arizasi va uning ilovalarini javobgar hamda iqtisodiy sudga soliq to‘lovchining shaxsiy kabineti orqali elektron tarzda yuborish imkoniyati yaratiladi.

Qonun bilan Iqtisodiy protsessual kodeksining 150-moddasiga, da'vogar tomonidan da'vo arizasi va unga ilova qilingan hujjatlarning ko‘chirma nusxalarini javobgarga va uchinchi shaxslarga elektron tarzda yuborish imkoniyatini nazarda tutuvchi qo‘shimcha kiritilmoqda.

Enaxon Siddiqovaning so‘zlariga ko‘ra, bunda da'vogar-soliq to‘lovchi da'vo arizasi va ilova hujjatlarini sudga taqdim etishdan oldin soliq to‘lovchining shaxsiy kabineti orqali boshqa soliq to‘lovchi-javobgar va uchinchi shaxslarga yuborish hamda hujjatlar yuborilgani haqidagi tasdiqlovchi ma'lumotni keyinchalik sudga taqdim etish uchun axborot tizimi orqali yuklab olish imkoniyatiga ega bo‘ladi.

Qonun senatorlar tomonidan ma'qullandi.

Avvalroq sudyaning vakolatlarini muddatidan ilgari tugatishda endi prezident bilan kelishish talab etilmasligi, bundan buyon sudyalar sudgacha majlis o‘tkazishga haqli ekani belgilangan edi.