Huquqiy demokratik davlat va adolatli fuqarolik jamiyati qurish jarayonida yagona davlat huquqiy siyosatini amalga oshirish, bunda bir xil huquqni qo‘llash amaliyotini shakllantirish, inson huquq va erkinliklarining samarali himoya qilinishini ta'minlash, shuningdek, aholining huquqiy madaniyatini oshirishning yaxlit tizimini joriy etish maqsadida ushbu bo‘limlar faoliyati yo‘lga qo‘yildi.
Shuni alohida ta'kidlash lozimki, hozirgi kunda tuman-shaharlarda adliya bo‘limlarining ish yuritayotganligi o‘z samarasini bermoqda.
Jumladan, respublikaning barcha tuman va shahar adliya bo‘limlari tomonidan fuqarolarning ko‘plab murojaatlari chuqur tahliliy o‘rganib chiqilib, aksariyat holatlarda murojaatlarning qanoatlantirilishiga erishilmoqda.
Birgina Toshkent viloyatining tuman (shahar) adliya bo‘limlariga joriy yilning 1-choragi davomida kelib tushgan 2400 dan ortiq murojaatlarning 1452 tasi yoki qariyb 60 foizdan ortig‘i qanoatlantirilgan.
Bo‘limlar tomonidan aniqlangan qonun buzilish holatlari yuzasidan ko‘plab taqdimnoma, ma'muriy javobgarlikka tortish yuzasidan takliflar hamda fuqarolarning huquq va manfaatlarini himoya qilish maqsadida sudlarga da'vo arizalari kiritilishi ta'minlanmoqda.
Bundan tashqari, qonun hujjatlarini ijrochilarga yetkazish, huquqiy maslahatlar berish, huquqiy targ‘ibotni tashkil etish, mahalliy hokimlik va kengashlarning normativ tusdagi qarorlarini huquqiy ekspertizadan o‘tkazish, huquqni qo‘llash amaliyotini tahlil qilish, yuridik xizmat faoliyatini muvofiqlashtirish sohasida ham bir qator ijobiy ishlar amalga oshirilmoqda.
Adliya bo‘limlariga yuklatilgan vazifalardan kelib chiqqan holda kelgusida ham yuqoridagi kabi ishlar tizimli ravishda davom ettirilishiga umid bildirib qolamiz.
