Davlat statistika qo‘mitasi qayta tashkil etiladi

Hujjatda islohotlarning ustuvor yo‘nalishlari qayd etiladi. Jahon banki ko‘magida ishlab chiqilgan O‘zbekiston Respublikasi statistikasini 2020-2025 yillarda rivojlantirishning milliy strategiyasini, shuningdek uni amalga oshirish bo‘yicha «Yo‘l xaritasi»ni tasdiqlash rejalashtirilmoqda, deb yozadi Norma.
 
Asosiy maqsad: huquqiy va tashkiliy, statistik infratuzilmani va ma'lumotlarga ishlov berishni takomillashtirish, foydalanuvchilar va yetkazib beruvchilar o‘rtasidagi o‘zaro munosabatlarni yaxshilash, ayrim statistik ko‘rsatkichlar va uslubiyatlarni modernizatsiyalash. Loyihada sohani rivojlantirishda statistik ma'lumotlar foydalanuvchilarini yuqori darajada qanoatlantirish, statistik ma'lumotlarni yetkazib beruvchilar motivatsiyasi va xodimlarning yuqori malakasini ta'minlash, samarali muvofiqlashtirish, davlat va hamkorlar tomonidan har tomonlama qo‘llab-quvvatlashga erishish nazarda tutilmoqda.
 
Davlat statistika qo‘mitasi negizida barcha huquqlar va majburiyatlar bo‘yicha huquqiy vorislik sharti bilan Milliy statistika qo‘mitasini tashkil etish nazarda tutilmoqda. Bu boshqa davlat organlari va tashkilotlariga tobe bo‘lmagan, mustaqil idora bo‘lishi rejalashtirilmoqda, u bevosita prezident va bosh vazirga hisobot beradi.
 
Milliy statistika qo‘mitasi va uning tuzilmaviy bo‘linmalari tomonidan shakllantiriladigan statistika ma'lumotlari rasmiy statistika ma'lumotlari sifatida e'lon qilinadi. Qo‘mitaga vazirlik va idoralarning idoraviy ma'lumotlar bazasiga kirish imkoniyati taqdim etiladi. Statistika organlari ishiga, shu jumladan rasmiy hisobotlarni to‘plash va kuzatuvlarga aralashish taqiqlanadi.
 
Milliy statistika qo‘mitasi raisi va uning to‘rt o‘rinbosarlari, shu jumladan birinchi o‘rinbosari mamlakat prezidenti tomonidan lavozimga tayinlanadi va lavozimdan ozod etiladi. Idoraning markaziy apparatida strategiya va «Yo‘l xaritasi»ni amalga oshirish ishlarini tashkil etish va monitoring qilish, yozishmalarni tayyorlash, tashkil etish va o‘tkazish boshqarmasi va ushbu jarayonlarni avtomatlashtirish bo‘yicha ixtisoslashtirish bo‘lim shakllantiriladi.
 
Statistika ishlari dasturini ishlab chiqish va uning to‘liq bajarilishini ta'minlash vazifasi Milliy statistika qo‘mitasining Statistika kengashiga topshiriladi. Qo‘mita, Moliya vazirligi va MB, boshqa manfaatdor vazirliklar va idoralar vakillaridan Milliy statistika qo‘mitasi huzurida Texnik kotibiyat, shuningdek strategiya doirasidagi chora-tadbirlarni amalga oshirish va monitoring qilish bo‘yicha tarmoq ishchi guruhlari tuziladi.
 
2021 yildan boshlab Milliy statistika qo‘mitasi tomonidan xalqaro e'tirof etilgan tavsiyalarga muvofiq standartlar va tavsiflarni unifikatsiyalash uchun barcha rasmiy statistika ishlab chiqaruvchilarining (davlat organlari va ularning bo‘linmalari) statistik uslubiyati davriy auditi o‘tkaziladi. Natijalarga qarab organ tomonidan tegishli ekspert xulosalari beriladi.
 
Loyiha o‘zgartirilishi, unga qo‘shimcha kiritilishi yoki rad etilishi mumkin.