Maktab yarmarkalari tashkil etish, o‘quvchilarni arzon va sifatli o‘quv qurollari bilan ta'minlash, narx-navo haddan ortiq oshib ketmasligiga erishish bugungi kunning muhim mavzularidan biriga aylanmoqda. Biz shu mavzudagi savollar bilan kanselyariya mahsulotlari ishlab chiqaruvchi tadbirkor Dilmurod Yo‘lchiyev bilan suhbatlashdik.
– Har yilgi o‘quv yiliga tayyorgarlik qanday bo‘lar edi?
– Oldingi yillarni aytadigan bo‘lsak, kanselyariya bozori uchun birmuncha shart-sharoitlar yaratilib berilardi. Masalan, Toshkent shahrida bozorlarda kanselyariya o‘quv qurollari sotish uchun yarmarkalar tashkil qilinardi. Hozirda yarmarkalar tashkil qilish uchun bir qancha muddat talab etiladi. Ya'ni rastalarga buyurtma berish, joylarni hozirlab, rastalarda savdo faoliyatini olib borish uchun tadbirkorlarga kamida 15-20 kun kerak bo‘ladi.
– Bu yilgi o‘quv yili 14 sentyabrdan boshlanishi kutilmoqda. Kanselyariya yetkazib beruvchilar bunga qay darajada tayyor?
– Pandemiya davrida hech kim 100 foiz quvvatda ishlagani yo‘q. Bu esa sentabr oyida o‘quv qurollarini yetkazib berishda yetarli zaxira mavjud emasligidan dalolat beradi. Buning natijasida mahsulotlar tanqisligi vujudga kelishi, talab oshishi natijasida narx-navo o‘sishi mumkin.
Narxlar oshishi ishlab chiqaruvchilarga bog‘liq bo‘lmasligi mumkin, ular narxlarni oshirmagan taqdirda ham, iste'molchiga mahsulotlar yetib borishi uchun ikki qo‘ldan o‘tadi, natijada narx-navo ko‘tarilishi mumkin.
Ishlab chiqarishga keladigan bo‘lsak, may-iyun oylarida kanstovarlar ancha kam miqdorda ishlab chiqariladi. Pandemiya sababli ham korxonalar to‘la quvvat bilan ishlamadi. Ishlab chiqaruvchilarimiz, importyor-distribyutorlarimizda xalqimiz ehtiyojini qondirishga yetarli miqdorda mahsulot bor, deb o‘ylamayman.
– O‘quv yili 14 sentyabrdan boshlansa...
– O‘quv yilini 14 sentyabrdan boshlashning yaxshi tomonlari ham bor, farzandlarimiz bilim olishda davom etishadi. Ammo, kanselyariya mahsulotlari yetishmasligi natijasida narx-navo keskin o‘sishi kuzatilishi mumkin. Narxlarni biz ishlab chiqaruvchilar oshirmasak ham, iste'molchiga yetib borguncha uch-to‘rt qo‘ldan o‘tib, narxi qimmatlashini kutish mumkin.
