14:51 / 06.12.2020
4318
Евро-1960 қаҳрамони Виктор Понедельник вафот этди

СССР миллий жамоасининг собиқ ҳужумчиси Виктор Понедельник 83 ёшида вафот этди. Бу ҳақда унинг қизи Анастасия ижтимоий тармоқлардаги саҳифасида маълум қилди.

Валерий Матицин / ТАСС

Унинг ўлимига узоқ вақт давом этган касаллик сабаб бўлган.

Футбол бўйича Россия чемпионатининг 6 ва 7 декабрь кунларига белгиланган 17-тур ўйинлари Виктор Понедельник хотирасига бир дақиқа сукут сақлаш билан бошланади.

  • Виктор Понедельник — 1960 йилда футбол бўйича Европа чемпионатида СССР жамоаси сафида иштирок этган. Финалда Югославияга қарши кечган ўйинда (2:1) қўшимча дақиқаларда бош билан гол уриб, жамоасига ғалаба келтирган. Понедельникнинг голи «олтин» гол бўлган — бу гол Россия футболи тарихидаги энг муҳим гол саналади. Виктор Понедельник 1960 йилги Европа чемпионати ғолибларидан шу вақтгача яшаётган ягона вакил эди.
  • Виктор Понедельник 1956 йилдан СССР чемпионатида иштирок этишни бошлаган, дастлаб Ростовнинг «Ростсельмаш» ва СКА клублари шарафини ҳимоя қилган. 1961 ва 1966 йилларда ЦСКА ва «Спартак» жамоаларига ўтган, аммо москваликлар клубларида бирорта ўйинда майдонга тушмаган. СССР чемпионатларида у жами 217 ўйинда иштирок этиб, 86 гол муаллифи бўлган.
  • Терма жамоада эса у 29 ўйинда майдонга тушган ва 20 гол урган, 1964 йилги Европа чемпионатида жамоаси билан кумуш медалга сазовор бўлган.
  • У 1966 йилда 29 ёшида соғлигидаги муаммо туфайли фаолиятини якунлашга мажбур бўлган. Кейин уч йил давомида «Ростсельмаш»да мураббий сифатида ишлаган.
  • Понедельник «Советский спорт» газетасида бўлим муҳаррири сифатида ишлаган, кейин «Футбол — Хоккей» нашрида бош муҳаррир бўлган. Футбол ҳақида тўртта китоб ёзган.

 

Top