O‘zbekiston-Xitoy hamkorligida ishlab chiqilgan vaksina nega 3 dozada olinishiga izoh berildi

«Xitoyda ko‘ngilli fuqarolar orasida vaksinani klinik sinovlardan o‘tkazdik. Tadqiqot kuzatuvlariga ko‘ra, ZF-UZ-VAC2001 vaksinasining birinchi dozasini olgandan so‘ng 30 va 60 kun o‘tgandan keyin tegishli ravishda 2- va 3-dozalar bilan o‘z vaqtida emlanish natijasida organizmda virusga qarshi antitanachalarning hosil bo‘lishini aniqladik. Aytishim mumkinki, vaksinaning 1-dozasi bilan emlangan fuqaroda virusni qayta yuqtirish ehtimoli mavjud. Biroq 2- va 3-dozalari bilan emlangan fuqarolarda antitanachalar sezilarli ravishda ko‘tarilishi olib borilgan tadqiqotlarimizda isbotlandi», dedi mutaxassis.

Avvalroq, AOKAda o‘tkazilgan brifingda innovatsion rivojlanish vazirining birinchi o‘rinbosari Shahlo Turdiqulova ZF-UZ-VAC2001 vaksinasini qabul qilgan insonda 95-97 foiz antitanachalar shakllanishi tahlillarda isbotlanganini ma'lum qilgandi. Shuningdek, u ba'zi holatlarda tana harorati 37 darajaga chiqishi, allergik ta'sirlar sezilishi yoki ukol qilingan joylar qizarishi mumkinligini, biroq bundan qo‘rqmaslik kerakligi va bu holatlar 2-3 kunda o‘tib ketishini aytib o‘tgan.

Ma'lumot uchun, 1 apreldan O‘zbekistonda koronavirus infeksiyasiga qarshi ommaviy emlash tadbirlari boshlangan. SSV matbuot xizmati ma'lumotlariga ko‘ra, ayni kungacha O‘zbekistonda koronavirus infeksiyasiga qarshi emlangan fuqarolar soni 108 283 nafarni tashkil etmoqda.