Hujjatga koʻra, profilaktik emlash Bosh davlat sanitariya vrachining qarori asosida joriy etiladi.
Profilaktik emlashni joriy etishga yuqumli kasallikning hududda aniqlanishi, kasallikning keng tarqalishi yoki ayrim guruhlarga yuqishi asos boʻladi.
Emlash birinchi navbatda kasallikni yuqtirish yoki boshqalarga yuqtirish xavfi yuqori boʻlgan shaxslar, kasallik oʻchogʻida bemor bilan muloqotda boʻlganlar hamda epidemiologik koʻrsatma boʻyicha emlanishi lozim boʻlgan shaxslardan boshlanadi.
Profilaktik emlash davlat roʻyxatidan oʻtkazilgan va tibbiyotda qoʻllanilishiga ruxsat etilgan vaksina bilan amalga oshiriladi.
Profilaktik emlashda shaxs tibbiy koʻrikdan oʻtkazilib, vaksinaga sezuvchanlik, ilgarigi ogʻir allergik reaksiya va boshqa qarshi koʻrsatmalar mavjudligi aniqlanadi.
Shaxsga vaksina va uning ehtimoliy taʼsiri, emlashdan keyingi kuzatuv hamda emlashni rad etishning huquqiy oqibatlari haqida maʼlumot beriladi.
Profilaktik emlangan har bir shaxs toʻgʻrisidagi maʼlumotlar emlash oʻtkazilgan zahoti Yagona tibbiyot axborot tizimiga kiritiladi.
Profilaktik emlangan shaxs dastlabki 30 daqiqa tibbiyot xodimi, keyingi 3 kun davomida esa shifokor va patronaj hamshira kuzatuvida boʻladi.
