14:59 / 03.05.2021
9766
Ҳуқуқ фаоли Сурат Икромов 76 ёшида вафот этди

Бугун, 3 май куни таниқли ўзбек ҳуқуқ фаоли Сурат Икромов Тошкент шаҳрида 76 ёшида вафот этди.

Фото: Сид Янишев

Турли манбалар марҳумнинг оиласига асосланиб тарқатган маълумотга кўра, Сурат Икромов 2021 йил февраль ойидан буён оғир хаста бўлган. Унинг ўлимига ўпканинг сурункали яллиғланиши, қандли диабет ва простата саратони сабаб бўлган.

Асли касби муҳандис бўлган Сурат Икромов Тошкентдаги хусусий полиграфия бизнеси давлат корхонаси томонидан олиб қўйилгач, узоқ вақт суд идораларига мурожаат қилиб келган. Адолат тополмаган тадбиркор аввалига маҳаллий ҳуқуқ фаолларига мурожаат қилади, кейинроқ улардан бирига айланади.

У 2002 йилда Ўзбекистон Мустақил инсон ҳуқуқлари ҳимоячилари ташаббус гуруҳига асос солади. Бу ташкилот Ўзбекистонда сиёсий ва диний мотивларга асосланган кўплаб суд жараёнлари мониторингини ўтказди. Ўз фаолияти давомида Сурат Икромов таъқиб ва таҳдидларга дучор бўлган.

Сурат Икромов томонидан диний-сиёсий айблар билан қамалганлар билан боғлиқ тергов ва суд жараёнларига доир тақдим этган маълумотлар халқаро инсон ҳуқуқлари ташкилотлари, БМТ, АҚШ Давлат департаментининг йиллик ҳисоботларидан ўрин олган.

2003 йилда Сурат Икромов Тошкентда номаълум шахслар томонидан ўғирлаб кетилиб, қаттиқ дўппосланади. Ҳужумни Ўзбекистон ИИВ текширган, аммо ҳужум қилган шахслар топилмаган.

Яқинларига кўра, ҳуқуқ фаолининг жанозаси 3 май куни пешин намозидан сўнг унинг Қорасарой маҳалласидаги хонадонида ўқилган ва Минор қабристонида тупроққа қўйилган.

Top