Samarqandda xotinini kaltaklab unga tan jarohati yetkazgan shaxsga jinoiy ish qo‘zg‘atildi

Samarqand viloyati Ishtixon tumanida xotinini kaltaklab unga tan jarohatlari yetkazgan shaxsga jinoiy ish qo‘zg‘atilgan. Bu haqda viloyat IIB axborot xizmati xabar bermoqda.

Ma'lum qilinishicha, 2021 yil 3 mart kuni Ishtixon tumani, «Zirabuloq» MFY, Arabxona qishlog‘ida yashovchi Sh.T. o‘zaro janjal natijasida turmush o‘rtog‘i Sh.Yu.ni kaltaklagan. Oqibatda Sh.Yu. tan jarohatlari olib, tuman tibbiyot birlashmasiga murojaat qilgan.

Bundan tashqari, 2021 yil 20 mart kuni Sh.T. mast holda xotinining qizlik uyiga kelib, uning ota-onasi va akasi M.Sh.ni uyatli so‘zlar bilan haqorat qilgan. Kelib chiqqan kelishmovchilik oqibatida kelinning akasi M.Sh. kuyovi Sh.T.ga tan jarohati yetkazgan.

Qayd etilishicha, mazkur holatlar yuzasidan Ishtixon tumani IIB huzuridagi tergov bo‘limi tomonidan Sh.T.ga nisbatan Jinoyat kodeksining 105-moddasi 1-qismi bilan, M.Sh.ga nisbatan 109-moddasi 2-qismi bilan ayb e'lon qilingan bo‘lib, hozirda tergov harakatlari olib borilmoqda.