Minglab afg‘onlar AQSh tomonidan evakuatsiya qilinish uchun Kobulga kela olmayapti

NBC telekanali ma'lumotlariga ko‘ra, joriy haftada AQSh hukumati Afg‘onistondagi missiya davomida amerikalik harbiylarga ko‘mak ko‘rsatgan yuzlab afg‘onlarga elektron pochta orqali maktub yo‘llagan. Ularga AQShga yoki uchinchi davlatlarga evakuatsiya qilinish uchun tayyor turish kerakligi va buning uchun Kobulga mustaqil ravishda kelishlari aytilgan. Biroq afg‘onlarga Kobulga yetib olishda toliblar tomonidan qo‘lga olinish yoki o‘ldirilish xavfi tahdid solmoqda.

Telekanalning ma'lum qilishicha, afg‘onlardan ba'zilari Kobulga yo‘llar toliblar tomonidan nazorat qilinayotgani sababli poytaxtga yetib bora olmayotganlarini ma'lum qilishgan. Shuningdek, o‘nlab afg‘onlar Kobulga yetib olish uchun pullari yo‘qligi sababli AQShdagi xayriya tashkilotlariga moliyaviy yordam so‘rab murojaat qilishgan.

Amerikalik amaldorlardan birining ta'kidlashicha, AQSh Afg‘onistonda deyarli qo‘shinlarsiz qolgan va evakuatsiya qilinishi kerak bo‘lgan afg‘onlarning Kobulga yetkazilishini ta'minlay olmaydi.

G‘arb OAVning ma'lum qilishicha, amerikalik harbiylarga ko‘mak ko‘rsatgan 18 mingga yaqin afg‘on va ular oilalarining 53 mingga yaqin a'zosi AQShga immigratsiya vizalarini olishga umid qilmoqda. Biroq bu ancha uzoq jarayon bo‘lgani sababli hozircha ularni AQShning uchinchi davlatlardagi bazalariga evakuatsiya qilishga qaror qilingan.