Markaziy bank tomonidan tijorat banklarining omonat mahsulotlari boʻyicha shartnomalari oʻrganilganda, ayrim banklar amaliyotida omonatchining oʻz mablagʻlarini qaytarib olish huquqini cheklashi mumkin boʻlgan shartlar mavjudligi aniqlandi.
Qayd etilishicha, ayrim omonat shartnomalarida bankning oʻz ixtiyoriga bogʻliq boʻlmagan ommaviy tartibsizliklar, mitinglar, koʻcha harakatlari (koʻchalardagi ommaviy namoyish va harakatlar), bosqinchilik holatlari va toʻlovga qobiliyatsizlik davrida omonat mablagʻini muddatidan oldin qaytarish boʻyicha bank javobgar hisoblanmasligi nazarda tutilgan.
Amaldagi qonunchilikka koʻra esa, omonat turidan qatʼi nazar, bank omonatchining talabi bilan omonat summasini yoki uning bir qismini qaytarishi shart. Shuningdek, isteʼmolchi huquqlarini cheklaydigan hamda qonunchilikka zid shartlar haqiqiy hisoblanmaydi.
Shundan kelib chiqib, Markaziy bank tijorat banklariga amaldagi omonat shartnomalarini toʻliq inventarizatsiyadan oʻtkazish, ulardagi isteʼmolchi huquqlarini cheklovchi va qonunchilikka zid shartlarni aniqlash hamda bunday holatlar mavjud boʻlsa, ularni zudlik bilan bartaraf etish talabini qoʻydi.
