15:26 / 28.07.2021
12533
Тожикистон президентининг жиянлари соғлиқни сақлаш вазирини калтаклагани айтилди
Тожикистон соғлиқни сақлаш вазири Жамолиддин Абдуллазода

Тожикистон президенти Имомали Раҳмоннинг синглиси Қурбонбиби Раҳмонова 20 июл куни 64 ёшида коронавирус асоратлари оқибатида вафот этганди.

Маълум бўлишича, ўша куни онасининг вафотини эшитган Тожикистон президентининг Фахриддин, Фаррух ва Зиёдулла Сафаров исмли жиянлари мамлакат соғлиқни сақлаш вазири Жамолиддин Абдуллазодани калтаклаган. Имомали Раҳмоннинг синглиси коронавирус юқтириб олгач, президент аппарати қошидаги касалхонада даволанаётган бўлган. Қурбонбиби Раҳмоновани даволаш учун Германия, Россия ва Ўзбекистондан махсус шифокорлар гуруҳи чақиртирилган. Улар бемор вафотидан икки соат олдин маҳаллий шифокорларнинг даволаш услублари хато бўлганини айтишган.

Бу гапни эшитган беморнинг уч ўғли онасига қараган шифокорлар гуруҳи аъзолари ва Тожикистон соғлиқни сақлаш вазири Жамолиддин Абдуллазодани калтаклашган. Вазир жағидан кучли зарба егани айтилмоқда. Шунингдек, касалхона раҳбари бошидан жароҳат олган. Шифокорлар ҳам енгил лат еган. Ака-укаларни Душанбе мэри, Имомали Раҳмоннинг ўғли Рустам Имомали тинчлантира олган.

Жамолиддин Абдуллазода ушбу воқеадан кейин АҚШдан 1,5 миллион доза Moderna вакцинаси олиб келиниши муносабати билан ўтказилган матбуот анжуманида иштирок этмаган. Унинг ўрнида қатнашган ўринбосари Шодихон Жамшед вазир мамлакатдан ташқарида хизмат сафарида бўлиб турганини айтган. У Абдуллазода калтаклангани ҳақидаги гапларни уйдирма деб атаган.

Маълум бўлишича, Тожикистон ИИВ ҳолат юзасидан суриштирув олиб бормоқда. Қурбонбиби Раҳмонова 21 июл куни Тожикистоннинг Данғара туманида дафн этилган.

Top