Samarqand viloyatida soxta COVID-19 testi natijasini sotayotganda ushlangan shaxsning ukasi «ishni tinchitish» uchun IIB xodimiga 5 ming AQSh dollari pora bermoqchi bo‘lganida qo‘lga olingan. Bu haqda viloyat IIB axborot xizmati xabar bermoqda.
Ma'lum qilinishicha, 2021 yil 30 iyul kuni Samarqand viloyati IIB Xavfsiz turizmni ta'minlash boshqarmasi tezkor xodimlari tomonidan Toyloq tumani markazida tezkor tadbir o‘tkazilgan. Tadbir davomida 1990 yilda tug‘ilgan, Samarqand shahri Imom Vose mahallasida yashovchi X.D. fuqarolardan biriga COVID-19 virusi mavjud emasligi to‘g‘risidagi soxta test tahlilini 180 ming so‘mga sotgan vaqtda ashyoviy dalillar bilan ushlanib, hujjatlar rasmiylashtirilgan.
Qayd etilishicha, holat yuzasidan tergovga qadar tekshirish harakatlari olib borish jarayonida fuqaro X.D. ning ukasi ishni rasmiylashtirmaslik va ijobiy hal qilib berish evaziga tezkor xodimga 5 ming dollarni pora sifatida taklif qilgan.
Xodim pora taklif qilish Jinoyat kodeksining 211-moddasi bilan jinoiy ish qo‘zg‘atilib, javobgarlikka tortilishiga sabab bo‘lishi to‘g‘risida ogohlantirishiga qaramay, X.D. keyin kelib uchrashishini aytib chiqib ketgan. Xodim holat yuzasidan viloyat IIB boshlig‘iga bildirgi bilan murojaat qilgan.
Bildirgiga asosan 2021 yil 31 iyul kuni IIV o‘z xavfsizligi boshqarmasi Samarqand viloyati bo‘limi hamda Samarqand shahar prokuraturasi xodimlari tomonidan tezkor tadbir o‘tkazilib, fuqaro I.X. tezkor xodimga 5 ming dollarni pora tariqasida bergan vaqtda ashyoviy dalillar bilan ushlangan.
Ta'kidlanishicha, mazkur holat bo‘yicha Samarqand shahar prokuraturasi tomonidan Jinoyat kodeksning 211-moddasi 1-qismi bilan jinoiy ish qo‘zg‘atilib, dastlabki tergov harakatlari olib borilmoqda.
