Bundan bir necha yil avval Kun.uz oqqon kasalligiga chalingan hamyurtimiz operatsiyasi uchun xayriya aksiyasi tashkil qilgan edi. Afsuski, bemor vafot etib, uning 4 nafar farzandi yetim qolgan. Marhumning yaqinlari undan qolgan 60 sotix uchastkani sotib, yetim qolgan bolalarni uyli-joyli qilishni niyat qilgan.
Toshkent viloyati O‘rta Chirchiq tumani Qorasuv mahallasida marhumga tegishli 60 sotix maydonga ega noturar joy bor. Marhumning oila a'zolari, xususan, singlisi Albina Fazliddinova tahririyatimizga murojaat qilib, ushbu noturar joyni sotishda yordam berishimizni iltimos qildi. Uning aytishicha, bu mulkni sotish uchun ko‘pchilik foydalanadigan usullardan foydalanib ko‘rgan, ammo natijasi bo‘lmagan.
Fazliddinovaning so‘zlariga ko‘ra, marhum akasi Doniyordan to‘rt farzand qolgan. Ular voyaga yetmoqda. Ularning kelajakda o‘z o‘rnini topishi, uyli-joyli bo‘lishi uchun akasiga tegishli noturar joyni sotishga qaror qilishgan.
“Akam oqqon kasalligiga chalingandi. Davolatish uchun bormagan joyimiz qolmadi. Afsus, akamni olib qola olmadik. Turmush o‘rtog‘i va to‘rt nafar farzandi bor. Ular hozir onamnikida yashashmoqda. Bolalar voyaga yetib qolgan. Ularning o‘z kelajagini qurishi, yaxshi o‘qib, hayotda o‘z o‘rnini topishi uchun mablag‘ zarur. Bizda esa uncha mablag‘ yo‘q.
Shu sababli akamga tegishli Toshkent viloyati O‘rta Chirchiq tumani Qorasuv posyolkasida joylashgan 60 sotixga yaqin noturar joyni sotmoqchimiz. Bu yerda 5 xonadan iborat uy, gaz, “svet” bor. Shuningdek, baliq boqishga mo‘ljallangan hovuz va stanoklar ham bor.
Mazkur noturar joy Toshkent viloyati markazi Nurafshon shahriga juda yaqin, Qo‘yliq bozoridan 15 daqiqalik masofada joylashgan. Uni sotishda yordam so‘ramoqchiman. Kim sotib olsa, tadbirkorlik qilib, savobga ham qolgan bo‘lar edi”, – deydi marhumning singlisi Albina Fazliddinova.
Shu o‘rinda biz ham tadbirkorlik bilan shug‘ullanuvchi vatandoshlarimizga murojaat qilib, mazkur manzildagi ko‘chmas mulkni sotib olib, ham manfaatli xarid ham, bir boquvchisiz oilaga yordam qilishga chorlab qolamiz.
Xaridorlar +998909880328 telefon raqami orqali Albina Fazliddinova bilan bog‘lanishlari mumkin.
Ijtimoiy reklama
