Yil oxirigacha moddiy madaniy meros obektlarining 50 foizi pasportlashtiriladi

Madaniy meros obektlaridan turizm maqsadida samarali foydalanish uchun vazirlik huzurida Madaniy meros agentligi faoliyati tashkil etildi.

Mazkur sohada shaffoflikni ta'minlash uchun Vazirlar Mahkamasida Madaniy merosni himoya qilish inspeksiyasi tashkil qilindi va Bosh prokuratura shtat tuzilmasida madaniy meros sohasidagi qonunchilik ijrosi ustidan, shu jumladan, madaniy merosni muhofaza qilish, asrashga doir ishlar va ulardan foydalanishning oqilona tashkil etilishini nazorat qilish bo‘yicha tegishli bo‘lim faoliyati yo‘lga qo‘yildi.

Turizm va sport vazirligi moddiy madaniy meros obektlaridan turizm maqsadida samarali foydalanish, ularni asrash va kelajak avlodga asl holida yetkazish yuzasidan choralar ko‘rmoqda.

Bugungi kunda madaniy meros obektlarini davlat tomonidan muhofaza qilish uchun Madaniy meros ko‘chmas mulk obektlari milliy ro‘yxatiga respublika bo‘yicha 8210ta obekt kiritilgan. Shundan, 4 788ta arxeologiya, 2 267ta arxitektura, 530ta diqqatga sazovor obektlar va 625tasi mahobatli san'at yodgorliklari hisoblanadi.

Obekt to‘g‘risidagi tarixiy ma'lumot, uning geoxaritasi, fotosuratlari hamda tasnifi yig‘majildini o‘zida jamlovchi har bir madaniy meros obektining pasportini yaratishga jiddiy yondashilmoqda.

Obekt pasportlashtirilsa, uni balansida saqlovchi tashkilot madaniy meros obektini muhofaza mazmuni ma'lumotlariga muvofiq holda saqlashga majbur bo‘ladi.

Joriy yilning 1 noyabr holatiga 8210ta moddiy madaniy meros obektlarining 35 foizi, ya'ni 2 873tasi pasportlashtirildi. Yil yakuniga qadar ushbu ko‘rsatkich 50 foizga yetkaziladi.

Yana bir muhim yo‘nalish bu - obektlarning chegara muhofaza tegralarini belgilash. Ushbu yo‘nalishda ishlar yetarlicha tashkil etilmaganligi madaniy meros joylashgan hududda noqonuniy qurilmalar qurilishi va yer maydonlarini o‘zboshimchalik bilan egallab olinishiga sharoit yaratgan.

Amaliy ishlar natijasida bugungi kunga qadar hududlardagi 3 mingga yaqin madaniy meros obektlarining chegara tegralari Davlat kadastr agentligining hududiy boshqarmalari bilan hamkorlikda belgilandi hamda muhofazaga olinganini ko‘rsatuvchi belgilar o‘rnatildi. Yil yakuniga qadar ularning soni 4 mingga yetkaziladi.

Chegara tegralarini belgilash orqali xalqimizning umummilliy boyligi bo‘lmish madaniy meros obektlarini muhofaza qilishga erishiladi.

Zaruriy mablag‘ ajratilmagani sababli moddiy madaniy meros obektlari kadastr hujjatlari to‘liq rasmiylashtirilmagan. Hozirgi kun holatiga 92 foiz moddiy madaniy meros obektlari (7 559ta)da kadastr hujjatlari tartibga keltirildi va Davlat kadastrlari yagona tizimiga kiritildi. Yil yakuniga qadar qolgan 651tasining kadastr hujjatlari rasmiylashtiriladi.

Madaniy meros agentligi va Davlat Soliq qo‘mitasi huzuridagi Kadastr agentligi o‘rtasida integratsiya yo‘lga qo‘yilgan. Madaniy meros obektlarini aks ettiruvchi elektron xaritalar ishlab chiqilmoqda.