«Nazoratimiz Senatga o‘tgani bilan ish samaradorligimiz oshib qolmaydi» - Ekologiya qo‘mitasi matbuot kotibi

12 noyabr kuni Ekologiya qo‘mitasi mutasaddilari ishtirokida matbuot anjumani o‘tkazildi. Kun.uz muxbiri xabariga ko‘ra, tadbirda Ekologiya qo‘mitasini to‘g‘ridan to‘g‘ri Senatga bo‘ysunuvchi organ qilib belgilanishi uning faoliyat samaradorligiga qanday ta'sir etishi borasida savol berildi.

Savol qo‘mita matbuot xizmati rahbari Ozod Rajabov javob berdi.

«Vazirlar Mahkamasi yoki Senatga bo‘ysunishidan qat'i nazar, Ekologiya va atrof-muhitni muhofaza qilish davlat qo‘mitasi ijrochi organ bo‘lib qolaveradi. Biz baribir qonun va prezident farmonlari ijrosini bajarishda davom etamiz.

Ha, O‘zbekistonda avval Tabiatni muhofaza qilish davlat qo‘mitasi to‘g‘ridan to‘g‘ri parlamentga bo‘ysungan. Lekin men Ekologiya qo‘mitasinining Vazirlar Mahkamasiga bo‘ysunuvchi organga aylantirilgandan keyin samaradorligi pasaydi, degan fikrlarga qo‘shilmayman. Chunki bizda manfaatlar muvozanati va tiyib turish tizimi bor. Bu tizimga ko‘ra, qayerga bo‘ysunishimizdan qat'i nazar ishimiz davom etaveradi.

Bizni boshqa organga bo‘ysunuvchi idoraga aylantirishgani bilan ish samaradorligi oshib ketishiga men ishonmayman. Bu shaxsiy fikrim», – dedi matubot kotibi.

Ma'lumot uchun, 1980-yillar oxirida O‘zbekistondagi ekologik muammolar kuchayib ketishi ortidan, 1988 yil aprel oyida hukumatning qarori bilan atrof-muhitni muhofaza qilish bo‘yicha davlat organi – O‘zbekiston Respublikasi Tabiatni muhofaza qilish davlat qo‘mitasi va uning hududiy bo‘linmalari tashkil qilingan.