50 ming dollar bilan ushlangan Mirishkor tumani hokimi o‘rinbosari 7 yilga qamaldi

U.Ya. Jinoyat kodeksi 25,168-moddasi 4-qismi “a” bandi va 28,211-moddasi 3-qismi “a” bandida nazarda tutilgan jinoyatlarni sodir qilganlikda aybli deb topilib, unga 2 yil muddatga mansabdorlik va moddiy javobgarlik lavozimlarida ishlash huquqidan mahrum qilib, bazaviy hisoblash miqdori 400 baravari miqdorida jarima jazosi va 7 yil muddatga ozodlikdan mahrum qilish jazosi tayinlangan.

X.B. Jinoyat kodeksi 28,211-moddasi 3-qismi “a” bandi bilan Jinoyat-protsessual kodeksining 83-moddasi 2-qismiga asosan aybsiz deb topilib, oqlangan. X.B. Jinoyat kodeksi 25,168-moddasi 3-qismi “a”, “v” bandlarida nazarda tutilgan jinoyatni sodir qilganlikda aybli deb topilib, unga 2 yil muddatga mansabdorlik va moddiy javobgarlik lavozimlarida ishlash huquqidan mahrum qilib, bazaviy hisoblash miqdori 300 baravari miqdorida jarima jazosi tayinlangan (Jinoyat kodeksining 62-moddasiga asosan bazaviy hisoblash miqdori 213 baravari miqdorida jarima jazosi qoldirilgan).

Ayni paytda birinchi instansiya sudi tomonidan chiqarilgan mazkur hukm qonuniy kuchga kirmagan bo‘lib, undan norozi taraflar hukm e’lon qilingan kundan boshlab, sudlanuvchilar va jabrlanuvchi esa hukm nusxasini olgan kundan boshlab 20 sutka ichida shu sud orqali Qashqadaryo viloyat sudi jinoyat ishlari bo‘yicha sudlov hay’atiga apellyatsiya tartibida shikoyat keltirishga yoki prokuror protest bildirishga haqliligi ma’lum qilingan.

Avvalroq, 2022 yil fevralida Mirishkor tumani hokimining mahalla va oilani qo‘llab-quvvatlash masalalari bo‘yicha o‘rinbosari 50 ming dollar pora bilan qo‘lga tushgani haqida xabarlar tarqalgandi.