Tjournal tahririyati loyiha yopilganini e’lon qildi

Tjournal muharririyati 22 avgust, dushanba kuni loyiha yopilganini ma’lum qildi. «Biz qanchalik istasak ham, bu hazil yoki klikbeyk emas. Nashrimizning oxirgi ish kuni - 10 sentabr», deyiladi nashrning ijtimoiy tarmoqdagi sahifalarida paydo bo‘lgan xabarda. 

Nashr sayti RF Bosh prokuraturasi talabiga binoan 2022 yil 14 martdan boshlab Rossiyada «Roskomnadzor» tomonidan bloklangan. TJ bloklanishga qanday xabar yoki maqola sabab bo‘lganini haligacha bilmaydi. 

Bloklash e’lon qilinganidan so‘ng, nashr ishni davom ettirish uchun xodimlarni bosqichma-bosqich qisqartirishni boshladi. Biroq, bu chora yordam bermadi. Tahririyat loyihani rivojlantirish uchun ajratilgan mablag‘ tugab qolganini tan olishga majbur bo‘ldi. «Biz 11 yil, 2 oy va 21 kun deganda yopilamiz», — deyiladi Tjournal xabarida. 

Tjournal — 2011 yil 20 iyun kuni tashkil etilgan rus internet-nashri va yangiliklar agregatori. Asosiy mavzular - ijtimoiy tarmoqlar, bloglar, qonunchilik va gadjetlar. Nashrning o‘z ma’lumotlariga ko‘ra, saytga bir oyda 4 million kishigacha kirgan. 

Rossiyaning Ukrainaga qarshi urushi boshlanganidan beri, «Roskomsvoboda» loyihasiga ko‘ra, «Roskomnadzor» bir necha mingta saytni - yirik yangiliklar nashrlari, ijtimoiy tarmoqlar, jamoat tashkilotlari, savdo va IT-kompaniyalar saytlarini go‘yoki harbiy mojaro haqida yolg‘on ma’lumotlarni joylashtirgani uchun bloklagan.