Jismoniy shaxslarni identifikatsiyalash telefon raqami orqali amalga oshiriladi

Vazirlar Mahkamasining “O‘zbekistonda jismoniy shaxslarni identifikatsiyalash Mobil-ID tizimini joriy etish chora-tadbirlari to‘g‘risida”gi qarori qabul qilindi.

Foto: Tabyldy Kadyrbekov

Mobil-ID tizimida identifikatsiyalash, tizimdan foydalanish va identifikatsiyani bekor qilishni tartibga soluvchi nizom tasdiqlangan bo‘lib, unga ko‘ra:

shaxsni Mobil-ID tizimi yordamida identifikatsiyalash fuqaro xohishiga ko‘ra davlat xizmatlari markazi yoki notarial idora tomonidan (fuqaroning yuzini raqamli formatda rasmga tushirish, elektron shaklda qo‘l barmog‘i izini olish orqali) yoxud YaIDXP mobil ilovasi (fuqaroning masofadan biometrik identifikatsiyalash (Face-ID) usuli yoki ID-kartadagi elektron raqamli imzoni qo‘llagan holda) orqali amalga oshiriladi;
bevosita davlat xizmatlari markazlari yoki notarial idora orqali fuqarolarni Mobil-ID tizimida identifikatsiyalash 2022 yil 31 dekabrga qadar to‘lov undirilmasdan, 2023 yil 1 yanvardan boshlab BHM 2 foizi miqdorida to‘lov undirish orqali amalga oshiriladi; YaIDXP mobil ilovasi orqali murojaat qilinganda bepul amalga oshiriladi;
Mobile-ID tizimi foydalanuvchilari moliyaviy xizmatlardan tashqari barcha davlat xizmatlaridan elektron raqamli imzosiz foydalanishi mumkin.

Shaxs YaIDXP mobil ilovasi orqali identifikatsiyadan o‘tganda mobil raqam aynan ushbu shaxsga tegishli bo‘lishi lozim, identifikatsiya davlat xizmatlari markazi yoki notarius orqali amalga oshirilganda esa istalgan mobil telefon raqamiga bog‘lanadi.