Turkiyada o‘tgan amputantlar o‘rtasidagi jahon chempionatida 3-o‘rinni qo‘lga kiritgan matonatli futbolchilarimiz Toshkentga qaytishdi.
Qahramonlarni aeroportda ularning oila a’zolari, bir qator rasmiylar, OAV vakillari va muxlislar kutib olishdi.
Jamoa sardori, 3 karra jahon chempioni Abdujamil Shukurov Turkiyaga (0:1) qarshi yarimfinalda mezbonlarga «devorlar ham yordam berganini» ta’kidladi: «2007 yildan beri turklarni doim mag‘lub etib kelardik. Lekin ular bu musobaqaga yil davomida tayyorgarlik ko‘rishdi, rahbariyati katta e’tibor qaratdi. Oxiri o‘z uylarida bizdan ustun kelishdi.
Raqib tezkor gol urib, qolgan vaqt davomida himoyalandi. Ular faqat bizdan xavfsirayotgandi. Mayli, nima bo‘lsa yaxshilikka. Sovrindorlar qatoriga kira oldik. Keyingi mundiallarda yoshlarimiz bronzani oltinga aylantirishadi, Xudo xohlasa».
Azizxon Azimov Italiya (5:1) bilan o‘yinda — farzandlari tug‘ilgan kunda gol urish imkonini bergani uchun jamoadoshlaridan minnatdor: «Italiya bilan o‘yin kuni egizak farzandlarim tug‘ildi. Yigitlar penaltini menga berib, o‘ziga xos sovg‘a qilishdi. Golni birgalikda nishonladik».
Jamoaning yosh a’zolaridan biri Umidjon Sirojiddinov intervyu berayotib, ota-onasini quchoqlab oldi va ko‘zida yosh ila ularga tashakkur aytdi: «Paralimpiya sport turlaridan ham takliflar bo‘lgan, lekin futbolni tanlaganman. Meni har doim qo‘llab-quvvatlagan, qayerda bo‘lsam ham, «puling bormi?» deb qayg‘urgan ota-onamga rahmat deyman».
