Paxtaobod tumaniga yangi hokim tayinlandi

Favqulodda vaziyatlar vaziri o‘rinbosari Azizbek Latifjonov Andijon viloyati Paxtaobod tumani hokimi lavozimiga tayinlandi.

Azizbek Rahimovich Latifjonov 1977 yilda Andijon viloyati Izboskan tumanida tug‘ilgan. 1999 yilda Andijon muhandislik-iqtisodiyot institutini, 2000 yilda O‘zbekiston Respublikasi Bank-moliya akademiyasini tamomlagan.

U mehnat faoliyatini 1994 yilda «O‘zbekiston sanoat-qurilish banki» ochiq aksiyadorlik tijorat banki Andijon viloyati bo‘limi pul almashtirish shoxobchasi kassiri vazifasidan boshlagan. Turli yillarda bank sohasida faoliyat ko‘rsatgan, 2007 yildan Moliya vazirligi tizimida ishlay boshlagan. 

2007-2011 yillarda Moliya vazirligi Investitsiyalar boshqarmasi hududiy kapital qurilish dasturlarini moliyaviy tartibga solish bo‘limi boshlig‘i, 2011-2015 yillarda O‘zbekiston Respublikasi Moliya vazirligi investitsiyalar boshqarmasi boshlig‘i o‘rinbosari–hududiy kapital qurilish dasturlarini moliyaviy tartibga solish bo‘limi boshlig‘i, 2015-2017 yillarda O‘zbekiston Respublikasi Moliya vazirligi investitsiyalar boshqarmasi boshlig‘i vazifasida faoliyat ko‘rsatgan.

Azizbek Latifjonov 2017 yil oktyabrida O‘zbekiston favqulodda vaziyatlar vazirining moddiy-texnika va moliya-iqtisodiyot bo‘yicha o‘rinbosari lavozimiga tayinlangandi.

Paxtaobod tumaniga 2022 yil fevralidan buyon Elyorbek Usmonov rahbarlik qilib kelayotgandi.

U shu yil sentabrida prezident administratsiyasi rahbari Sardor Umrzoqov rahbarligidagi yig‘ilishda rahbarlik etikasi qoidalariga rioya etmagani, xizmat vakolatidan chetga chiqib qonunbuzilish holatlariga yo‘l qo‘ygani uchun ishdan olingandi.