AQSh eng kuchli yadro bombasi - B83-1’ni qurollari ro‘yxatidan chiqaryapti

AQSh Mudofaa vazirligi B83-1 bombasi qurollar ro‘yxatidan chiqarilishiga uni ishlatish cheklanganligi va texnik xizmat ko‘rsatish xarajatlari yuqori ekanligi bilan izoh berdi.

AQSh Mudofaa vazirligi mamlakat yadro arsenalidagi so‘nggi megatonnalik qurol bo‘lgan B83-1 termoyadroviy bombasini qurollari ro‘yxatidan chiqarishga qaror qildi. Bu haqda 27 oktyabr, payshanba kuni e’lon qilingan milliy xavfsizlik strategiyasida ma’lumot berildi. 

Pentagonning tushuntirishicha, taxminan 1,2 megatonna trotil quvvatiga ega B83-1’dan foydalanish imkoniyati vaqt o‘tishi bilan kamayib bormoqda va unga texnik xizmat ko‘rsatish tobora ko‘proq mablag‘ talab qilyapti. B83-1 bombasi 1983 yildan beri qurollar ro‘yxatida turibdi hamda Kaliforniya universitetining Livermor laboratoriyasida ishlab chiqilgan. Umuman olganda, Qo‘shma Shtatlar ushbu bombalarning 650 tasini ishlab chiqarishga muvaffaq bo‘ldi. Vashingtonning yangi milliy strategiyasi maqsadlaridan biri yadro qurolining mamlakat mudofaasidagi rolini kamaytirishdir.

Hozirda Pentagon Xitoyni «AQSh milliy xavfsizligiga eng jiddiy tahdid» va «strategik raqobatchi» sifatida ko‘rmoqda, Rossiyaga esa «o‘tkir tahdid» sifatida qaralmoqda. «Xitoydan farqli o‘laroq, Rossiya uzoq muddatda AQShga tizimli ravishda e’tiroz bildira olmaydi. Lekin Rossiya agressiyasi bizning manfaatlarimiz va qadriyatlarimizga to‘g‘ridan to‘g‘ri hamda keskin tahdiddir», - dedi AQSh mudofaa vaziri Lloyd Ostin. Qo‘shma Shtatlar belgilangan muddatdan bir necha oy oldin NATOning Yevropadagi bazalariga yangilangan B61-12 termoyadro bombalarini yuboradi. Alyans Rossiyadan yadroviy zarba berish tahdidi ostida mashg‘ulotlar o‘tkazmoqda.