Zelenskiy: «Bugun tarixiy kun - biz mamlakatimiz janubiga qaytmoqdamiz»

«Bugun tarixiy kun - biz mamlakatimiz janubiga qaytmoqdamiz», - deya ma’lum qildi Ukraina prezidenti Volodimir Zelenskiy Xersonning rossiyaliklardan ozod etilganiga izoh berib.

Foto: president.gov.ua

«Hozircha bizning himoyachilarimiz shahar chetida. Juda oz qoldi - kirishni boshlayapmiz. Lekin maxsus bo‘linmalar allaqachon shaharda», - dedi Zelenskiy vatandoshlariga videomurojaatida.

Uning qo‘shimcha qilishicha, Xerson aholisi bosqinchilarning barcha tahdidlari, qatag‘onlari va zo‘ravonliklariga qaramay, Ukraina bayroqlarini asrab yurgan va Ukrainaga ishongan.

«Ukrainaga bo‘lgan umid doimo oqlanadi - Ukraina har doim o‘zinikini qaytaradi», dedi davlat rahbari.

«Himoyachilarimiz tomonidan ozod qilingan boshqa barcha shaharlarda ham shunday bo‘lgan. Bizning qaytishimizni kutayotgan shaharlarda ham shunday bo‘ladi», deb va’da berdi u.

Ukrainaga keng ko‘lamli bosqinning boshidanoq rus qo‘shinlari Xerson viloyatiga kirib, uning deyarli barcha hududini asta-sekin egallab olishni boshladilar. Ukraina mart oyi boshida Xerson ustidan nazoratni yo‘qotdi. Shundan so‘ng rossiyaliklar okkupatsion «ma’muriyati»ni tuzdi, mahalliy aholini, jumladan siyosatchilar, jurnalistlar va faollarni o‘g‘irlab ketishdi, shuningdek, rus rubllarini muomalaga kiritishga harakat qilishdi.

Sentabr oyi oxirida, «referendum» deb atalgan jarayondan so‘ng, Moskva Xerson, shuningdek, Donetsk, Luhansk va Zaporijjya viloyatlarini annexia qilganini e’lon qildi. Ukraina Qurolli kuchlarining qarshi hujumi fonida rus qo‘shinlari Dniproning chap qirg‘og‘iga chekinishga majbur bo‘lishdi.

#Xerson #Volodimir Zelenskiy